मुंबई पुन्हा हादरली; ११ वर्षीय मुलीवर सोसायटीच्या वॉचमनकडून अत्याचार

मुंबईः साकीनाका बलात्कार प्रकरण ताजे असतानाच मुंबईत आणखी एक धक्कादायक घटना घडली आहे. रहिवासी सोसायटीच्या वॉचमनने एका ११ वर्षीय मुलीवर अत्याचार केल्याचा प्रकार उघडकीस आला आहे. महिनाभराच्या आत मुंबईत आणखी एक घटना घडली असल्यानं संताप व्यक्त होत आहे.

कांजूरमार्गमध्ये हा प्रकार घडला असून पोलिसांनी वॉचमनला अटक केली आहे. सोसायटीच्याच वॉचमननं अल्पवयीन मुलीवर अत्याचार केल्याचा प्रकार उघडकीस आल्यावर परिसरात संतापाची लाट उसळली आहे. या आरोपीला कठोरात कठोर शासन व्हावे, अशी मागणी परिसरातील रहिवाशांकडून होत आहे.

वाचाः उद्धव ठाकरेंनी ‘भावी सहकारी’ हा शब्दप्रयोग का वापरला?; संजय राऊत म्हणाले…

पोलिसांनी वॉचमनला काल रात्री अटक केली असून आयपीसी कलम ३५४ आणि पोस्को कायद्यांतर्गंत गुन्हा दाखल करण्यात आला आहे. आज आरोपीला पोलिस न्यायालयासमोर हजर करणार आहेत.

वाचाः आता एटीएममधून मिळणार औषधे; प्रेग्नन्सी किटदेखील होणार उपलब्ध

साकीनाका बलात्कार प्रकरणी गुन्हा दाखल

साकीनाका येथील रशीद कंपाऊंड परिसरात शुक्रवारी पहाटेच्या वेळी मोहन चौहान या नराधमाने त्याला परिचित असलेल्या महिलेची अत्यंत निर्घृण हत्या केली होती. ही घटना उघडकीस आल्यानंतर राज्यात खळबळ उडाली होती. त्यारात्री मोहनने केलेल्या अमानुष मारहाणीत महिला गंभीर जखमी झाली होती. राजावाडी रुग्णालयात उपचार सुरू असताना, तिचा मृत्यू झाला. दरम्यान, घटनेची माहिती मिळताच पोलिसांनी तेथे धाव घेऊन महिलेला रुग्णालयात दाखल केले. तसेच त्यानंतर लगेच तपास सुरू करून उत्तर प्रदेशात पळण्याच्या तयारीत असलेल्या ४५ वर्षीय मोहनच्या मुसक्या आवळल्या होत्या. पोलिस चौकशीत त्याने केलेल्या गुन्ह्याची कबुली दिली आहे. शिवाय त्याने गुन्ह्यात वापरलेले शस्त्र आम्ही हस्तगत केले आहे. घटनास्थळावरील सीसीटिव्ही फुटेज आणि पोलिसांनी जमा केलेली माहिती, पुरावे यांची सांगड बसत असून, येत्या १५ ते २० दिवसांत आमचा तपास पूर्ण होईल, असेही त्यांनी सांगितले. ‘डीएनए अहवाल लवकर मिळावा यासाठीदेखील आम्ही प्रयत्नशील राहू. तो उपलब्ध झाल्यावर महिनाभराच्या आत आम्ही आरोपपत्र दाखल करू,’ असे पोलिस आयुक्त हेमंत नगराळे यांनी सांगितले.

वाचाः महाराष्ट्र एटीएसची मोठी कारवाई; मुंबईतून संशयित दहशतवादी ताब्यात