मावळचे माजी आमदार दिगंबर भेगडे यांचे हृदयविकाराने निधन; भाजपामध्ये मोठी पोकळी निर्माण

मावळ तालुक्यासह पुणे जिल्ह्याच्या राजकीय क्षेत्रात प्रदीर्घकाळ कार्यकर्तृत्वाचा ठसा उमटविणारे, अध्यात्मिक व कृषी क्षेत्रातील जाणकार व्यक्तिमत्व, मावळचे माजी आमदार दिगंबर बाळोबा भेगडे (वय-७५) यांचे गुरुवारी दुपारी दीडच्या सुमारास हृदयविकाराच्या झटक्याने निधन झाले. भेगडे यांच्या निधनामुळे मावळ तालुका व पुणे जिल्ह्यातील भाजपचे मोठे नुकसान झाले असून, भाजपामध्ये मोठी पोकळी निर्माण झाली आहे.

भेगडे यांना गुरुवारी सकाळी दहाच्या सुमारास अस्वस्थ वाटू लागल्याने तातडीने सोमाटणे फाटा येथील खासगी रुग्णालयात दाखल करण्यात आले. उपचार सुरू असताना हृदयविकाराचा तीव्र झटका आल्याने त्यांची प्राणज्योत मालवली.

वाचा- संघाच्या पराभवात रोहित शर्माने इतिहास घडवला; आंतरराष्ट्रीय क्रिकेटमध्ये अशी कामगिरी करणारा पहिला…

भेगडे यांनी इंदोरी गावचे उपसरपंच म्हणून त्यांच्या राजकीय कारकिर्दीस सुरुवात केली. मावळ तालुका कृषी उत्पन्न बाजार समितीचे सदस्य, मावळ तालुका खरेदी विक्री संघाचे सदस्य, मावळ तालुका पंचायत समितीचे उपसभापती, भाजपाचे जिल्हाध्यक्ष, दोन वेळा मावळ तालुक्याचे आमदार म्हणून त्यांनी प्रतिनिधित्व केले होते.

वाचा-महाराष्ट्रात सापडला जगातील सर्वात दुर्मिळातील दुर्मिळ धातू; कोणालाच पत्ता नाही!

दिगंबर भेगडे यांच्या आकस्मिक निधनाने राजकीय, सामाजिक आणि आध्यात्मिक क्षेत्राला मोठा धक्का बसला आहे. त्यांच्या पश्चात पत्नी भागुबाई, दोन भाऊ, मुलगा मनोहर आणि प्रशांत, तीन मुली, सुना, नातवंडे, पतवंडे असा मोठा परिवार असुन मावळ तालुका भाजपचे अध्यक्ष रवींद्र भेगडे यांचे ते सख्खे चुलते होत.