‘घर बंदूक बिर्याणी’ चित्रपटात आर्ची का नाहीये? नागराज मंजुळे उत्तर देत म्हणाले…

मुंबई- मराठी चित्रपटसृष्टीतील लोकप्रिय दिग्दर्शक नागराज मंजुळे यांनी आपल्या चित्रपटांनी प्रेक्षकांच्या मनावर भुरळ घातली. ‘सैराट’, ‘फँड्री’, ‘झुंड’ अशा चित्रपटातून त्यांनी महत्वपूर्ण विषयांवर भाष्य केलं. त्यांच्या दिग्दर्शनाची जादू चालली आणि त्यांच्या प्रत्येक चित्रपटाला प्रेक्षकांचा उदंड प्रतिसाद लाभला. नागराज लवकरच ‘घर बंदूक बिर्याणी’ या चित्रपटातून प्रेक्षकांच्या भेटीला येणार आहेत. या चित्रपटात ते दिग्दर्शकाच्या नाही तर कलाकाराच्या भूमिकेत दिसणार आहेत. या चित्रपटात ते एका महत्वपूर्ण भूमिकेत दिसणार आहेत. त्यांच्यासोबत या चित्रपटात अभिनेते सयाजी शिंदे आणि आकाश ठोसर मुख्य भूमिकेत आहेत. या चित्रपटानिम्मित्त दिलेल्या एका मुलाखतीत नागराज यांना या चित्रपटात आर्ची म्हणजे रिंकू राजगुरू का नाहीये असा प्रश्न विचारण्यात आला.

नागराज यांचा चित्रपट म्हणजे आकाश आणि रिंकू असं समीकरण असतं. मात्र या चित्रपटात रिंकू का नाही असा प्रश्न नेटकऱ्यांना पडला. नुकतीच नागराज यांनी शोध मराठी मनाचा २०२३ या कार्यक्रमात हजेरी लावली होती. तिथे एका पत्रकाराने आर्चीबद्दल विचारलेल्या प्रश्नाला उत्तर देताना नागराज म्हणाले, ‘आर्ची ही काही भूमिका नाहीये. प्रत्येक चित्रपटात तशी भूमिका असणं गरजेचं नाहीये. हा आम्हा तिघांचा चित्रपट आहे. तिच्या भूमिकेची गरजच नव्हती त्यामुळे ती नाहीये.’ नंतर थोडी फिरकी घेत ते म्हणाले, ‘आम्ही इथे बसलोय ते दिसलं नाही का तुला? जे दिसलं नाही त्याबद्दल विचारलंस. हा एक वेगळा चित्रपट आहे. तुम्ही टीझरवरून अंदाज बांधू शकत नाही की चित्रपटात नक्की काय आहे. हा एक वेगळ्या विषयावरचा आणि वेगळ्या धाटणीचा चित्रपट आहे. त्यामुळे तुम्ही चित्रपटात आर्चीला शोधू नका.’ असं त्यांनी म्हटलं आहे.

या कार्यक्रमाला नागराज यांच्यासोबत सयाजी आणि आकाश यांनीही हजेरी लावली होती. कार्यक्रमात त्यांनी आपले चित्रपटाबद्दलचे अनुभवही सांगितले. सोबतच मनमोकळ्या गप्पाही मारल्या. ‘घर बंदूक बिर्याणी’ हा चित्रपट ३० मार्च रोजी प्रदर्शित होणार असल्याचं म्हटलं जातंय.