करोना काळात शाहरुखने केलेली मोठी मदत; मराठमोळ्या अभिनेत्रीची किंग खानसाठी खास पोस्ट, म्हणाली-

मुंबई- लोकप्रिय बॉलिवूड अभिनेता शाहरुख खान सध्या ‘पठाण’ चित्रपटामुळे सोशल मीडियावर चर्चेत आहे. त्याच्या ‘पठाण’ने कमाईचे अनेक रेकॉर्ड मोडले. शाहरुखने अभिनयासोबतच सामाजिक क्षेत्रातही मोठं काम केलं आहे. नुकत्याच एका वेबसाइटने जानेवारी २०२३ मधील सर्वोत्कृष्ट कलाकारांची यादी जाहीर केली. त्यात ‘पठाण’ चित्रपटासाठी किंग खानचं नावही आहे. सोबतच ‘ट्रायल बाय फायर’ मधील लोकप्रिय अभिनेत्री राजश्री देशपांडे हिचं नाव देखील आहे. आपल्या कामाचं कौतुक तर झालं पण त्याहीपेक्षा आपलं नाव शाहरुखचं नाव असलेल्या यादीत झळकलं याचा तिला प्रचंड आनंद झाला आहे. आपला आनंद तिने सोशल मीडियावर शेअर केला आहे. सोबतच तिने एक पोस्ट करत शाहरुखने करोना काळात केलेल्या मदतीबद्दलही सांगितलं आहे.

राजश्री गेली अनेक वर्ष सामाजिक संस्थांमध्ये काम करते आणि करोना काळात तिने अनेक गरजवंतांना मदत केली. करोना काळात तिच्या संस्थेला शाहरुखने मदत केली होती. आता एक पोस्ट करत तिने त्याचे आभार मानले आहेत. राजश्रीने इन्स्टाग्रामवर पोस्ट करत लिहिलं, ‘करोनामध्ये शाहरुख खानने माझी मदत केली होती. मराठवाडा, केरळ आणि छत्तीसगढ येथे मदत पोहोचवण्यासाठी त्याची मदत झाली. त्याने मीर फाउंडेशनला केलेल्या मदतीमुळे आम्ही त्यांना औषधं पोहोचवण्यात यशस्वी ठरलो. आता जानेवारी महिन्यातल्या उत्कृष्ट कलाकारांच्या यादीत आम्हाला एकत्र नामांकन मिळालं. करोनामधील सर्व कामांमुळे मी त्याला भेटू शकले नाही. यापुढे त्याची भेट कधी होईल हेदेखील ठाऊक नाही परंतु, त्याच्यासोबत काम करायचं स्वप्न मी कायम पाहत राहीन. मी ‘मन्नत’ मागितली आहे. एवढ्या मोठ्या कलाकारांसोबत माझं नाव घेतल्याबद्दल खूप खूप धन्यवाद.’

ट्रायल बाय फायर सिनेमातील राजश्रीची भूमिका चाहत्यांना प्रचंड आवडली. सिनेमात राजश्री नीलम कृष्णमूर्ती यांच्या भूमिकेत दिसली. यापूर्वीही तिने अनेक सीरिजमध्ये महत्वाच्या भूमिका साकारल्या आहेत. यासोबतच ती ‘मन कस्तुरी रे’ या चित्रपटात दिसली होती. दुसरीकडे ‘पठाण’ चित्रपटाने प्रदर्शनापासून आतापर्यंत ७०० कोटींचा गल्ला जमवला आहे.