काम नसल्याने महेश कोठारेंकडे आला अन् ‘धडाकेबाज’चा कवट्या महाकाल झाला;पाहा मास्कमागचा चेहरा

नुकतंच महेश यांच्या ‘डॅम इट’ या आमचरित्राचं प्रकाशन झालं. त्या सोहळ्यात बोलताना त्यांना कवट्या महाकालबद्दल विचारण्यात आलं. त्यावर बोलताना महेश म्हणाले, ‘तो माझा एक जवळचा मित्र होता. आता तो हयात नाहीये. तो गुजराती अभिनेता होता. त्याचं नाव चंद्रकांत पंड्या. मी गुजराती चित्रपट खूप केले. तेव्हा आमची ओळख झाली. दुर्दैवाने तेव्हा त्याच्याकडे काम नव्हतं. तो एके दिवशी मला अचानक भेटला. म्हणाला चल चहा घेउ. बोलता बोलता म्हणाला की महेश काही काम असेल तर दे. मी त्याला म्हटलं काम आहे पण संपूर्ण चित्रपटात मास्क घालावं लागेल. चेहरा दिसणार नाही. तो तयार झाला. अगदी एका पायावर तयार झाला. त्याने खूप छान पद्धतीने ते काम केलं आणि ते पात्र इतकं गाजलं. सुरुवातीला मी आणि लक्ष्या त्याला कवट्या महाकालचा रोल करून दाखवायचो. नंतर तो त्याचं त्याचं करू लागला. हयात असतांना त्याचं नाव मात्र कुणाला कळलं नाही.’

चंद्रकांत यांनी अनेक गुजराती चित्रपटात काम केलं आहे. त्यांनी सर्वाधिक गाजलेल्या ‘रामायण’ या मालिकेत निषाद राज राजाची भूमिका साकारली होती. त्यांनी २१ ऑक्टोबर २०२१ रोजी या जगाचा निरोप घेतला. ते ७२ वर्षाचे होते. मात्र दुसरीकडे महेश यांनी प्रत्येक मराठी प्रेक्षकाला पडलेलं कवट्या महाकाल नावाचं कोडं सोडवलं.