आमदार रवींद्र धंगेकर कितवी शिकलेयत? जाणून तुम्हालाही वाटेल आश्चर्य

रविंद्र धंगेकर यांच्या राजकीय कारकीर्दीची सुरुवात ही शिवसेनेतून झाली होती. त्यानंतर ते बराच काळ राज ठाकरे यांच्या मनसेत स्थिरावले. मनसेमध्ये असताना धंगेकर हे राज ठाकरे यांचे अत्यंत विश्वासू कार्यकर्ते म्हणून ओळखले जायचे. मनसेत त्यांनी अनेक महत्त्वाच्या पदांवर काम केलं. इथूनच धंगेकर यांच्या राजकीय कारकीर्दीचा आलेख उंचावत गेला. मात्र नंतर त्यांनी पुन्हा पक्षबदल करत काँग्रेसमध्ये जाणं पसंत केलं. धंगेकर हे तब्बल ४ वेळा नगरसेवक म्हणून निवडून आले आहेत. याकाळात आपण कसब्यामध्ये बरीच विकासकामं केल्याचा दावा ते करतात.

सामान्य कार्यकर्त्याच्या खांद्यावर हात ठेवत त्याला ताकद देण्याची भाजप नेते आणि शहराचे खासदार गिरीश बापट यांची स्टाईल धंगेकर यांनी अंगिकारली आणि यामुळेच कसब्यात धंगेकरांची ‘आपला माणूस’ अशी ओळख झाली. जन्माच्या दाखल्यापासून मृत्यूच्या दाखल्यापर्यंत सगळंच रवींद्र धंगेकर यांच्या कार्यालयात मिळू लागलं. लोकांच्या या छोट्या-छोट्या गरजा ओळखून रवींद्र धंगेकर यांनी काम सुरू ठेवलं. कोणाला दवाखान्यात मदत असू द्या किंवा इतर कोणतीही अडचण…रवींद्र धंगेकर यांचा फोन २४ तास चालू असायचा. कसब्यातील जनतेसाठी अर्ध्या रात्री धावणारा ‘आपला माणूस’ म्हणून धंगेकर यांनी लोकांच्या मनाचा ठाव घेतला.

प्रभागातील रस्ते, ड्रेनेज लाईनपासून पाण्याच्या समस्येवर रविंद्र धंगेकरांनी समाधानकारक काम केल्याचं येथील नागरिक सांगतात. याच विकासकामांच्या जोरावर त्यांनी मनसेकडून २००९ ची विधानसभा निवडणूक लढली. या निवडणुकीत त्यांनी भाजपचे विद्यमान खासदार आणि तत्कालीन उमेदवार गिरीश बापट यांना तगडं आव्हान दिलं. कसब्यातील दिग्गज नेते असणारे बापट नवख्या धंगेकरांपुढे अवघ्या ७ हजार मतांच्या फरकाने विजयी झाले होते.