Set Result: ‘सेट’चा निकाल मेअखेर?

‘यूजीसी’च्या वतीने पुणे विद्यापीठामार्फत घेण्यात आलेल्या या परीक्षेची पहिली उत्तरतालिका प्रसिद्ध होऊन त्यावर हरकती नोंदविण्याची प्रक्रियाही पूर्ण झाली होती. त्यानंतर अंतिम उत्तरतालिका व लगेच निकाल जाहीर करण्याच्या प्रतीक्षेत विद्यार्थी आहेत. याबाबत विद्यापीठाशी संपर्क साधला असता, या महिन्याच्या अखेरीस हा निकाल जाहीर होण्याची शक्यता वर्तविण्यात आली आहे. या परीक्षेची पहिली उत्तरतालिका प्रसिद्ध झाल्यानंतर, त्यावर उमेदवारांकडून आक्षेप नोंदविण्यात आले आहेत. त्यानंतर आता अंतिम उत्तरतालिका प्रसिद्ध होऊन, निकालाची प्रक्रिया सुरू होणार असल्याचे यावेळी सांगण्यात आले.

यंदाच्या ३८ व्या राज्यभरातील विविध केंद्रांवर घेण्यात आलेल्या ‘सेट’साठी लाख १९ हजार ८१३ उमेदवारांनी नोंदणी केली. त्यापैकी १ लाख १ हजार ३७ उमेदवारांनी ही परीक्षा दिली. या परीक्षेच्या उत्तरतालिकेवर आक्षेप नोंदविण्यासाठी पाच मे पर्यंतचा कालावधी दिला होता. त्यामुळे आता उमेदवारांकडून आलेल्या आक्षेपांची पडताळणी सुरू असून, त्यानुसार पुन्हा एकदा अंतिम सुधारित उत्तरतालिका प्रसिद्ध केली जाणार आहे. ही अंतिम उत्तरतालिका प्रसिद्ध झाल्यानंतर काही दिवसांनी निकाल जाहीर केला जाणार आहे.

‘सेट’ दोनदा घ्या

राज्य सरकारकडून प्राध्यापक भरतीची घोषणा करण्यात आली आहे. महाविद्यालये तसेच विद्यपीठाच्या विविध विभागांमध्येही ही प्रक्रिया होणार आहे. सीएचबी तत्वावर काम करणाऱ्या प्राध्यापकांच्या मानधनातही वाढ करण्यात आली आहे. त्यामुळे ‘नेट’प्रमाणे सेटही वर्षातून दोनदा घ्यावी, अशी मागणी केली जात आहे.