बॅंक ATMवर चोरट्यांचा डोळा; तब्बल ३८ लाखांची रोकड लंपास, CCTV कॅमेऱ्यावर कलर स्प्रे मारला

वैजापूरमध्ये गॅस कटरच्या मदतीने ‘एटीएम’ फोडून त्यातील सोळा लाख रुपये चोरांनी लंपास केल्याची घटना बुधवारी सकाळी उघडकीस आली. स्टेशन रस्त्यावरील आयडीबीआय बँकेच्या ‘एटीएम’वर चोरट्यांनी हा डल्ला मारला. या प्रकरणी वैजापूर पोलिसांत अज्ञात व्यक्तीविरुद्ध गुन्हा नोंदवण्यात आला. वैजापूर शहरातील स्टेशन रस्त्यावर आयडीबीआय बँकेचे ‘एटीएम’ आहे. अज्ञात चोरांनी चोरी करण्यापूर्वी तेथील सीसीटीव्ही कॅमेऱ्यावर स्प्रे मारला; तसेच बँकेतून वीजपुरवठा बंद केला. त्यानंतर गॅस कटरच्या साह्याने ‘एटीएम’ फोडून, त्यातील पाचशे रुपयांच्या नोटा असलेली एकूण सोळा लाख रुपयांची रोकड लंपास केली.

या घटनेची माहिती मिळाल्यानंतर अप्पर पोलिस अधीक्षक सुनील लांजेवार, स्थानिक गुन्हे शाखेचे पोलिस उपनिरीक्षक विजय जाधव, नरेंद्र खंदारे, विठ्ठल डाके, गोपाळ पाटील, आनंद घाटेश्वर, वैजापूर पोलिस ठाण्याचे शहर बीट अंमलदार योगेश झाल्टे यांनी घटनास्थळी भेट दिली. आरोपींचा छडा लावण्यासाठी श्वानपथकालाही पाचारण करण्यात आले. या प्रकरणी बँकेचे सहायक व्यवस्थापक संजीवकुमार बेहरा यांनी फिर्याद दिली. त्यावरून वैजापूर पोलिस ठाण्यात अज्ञात चोरट्यांविरोधात गुन्हा दाखल करण्यात आला आहे. पुढील तपास पोलिस उपनिरीक्षक पवनसिंह राजपूत करीत आहेत.
पोलिस खात्यात मोठी खांदेपालट; PSI अन् API बदलले, कोणाची कुठे झाली बदली? वाचा लिस्ट
चापानेर (ता. कन्नड) येथील बस स्थानकाजवळ भारतीय स्टेट बँकेचे ‘एटीएम’ बुधवारी पहाटे साडेचार ते पाच वाजेच्या सुमारास गॅस कटरच्या साह्याने चोरट्यांनी फोडले. त्यातून २२ लाख ६५ हजार रुपयांची रोकड चोरट्यांनी लंपास केली. ‘एटीएम’ रूममधील सीसीटीव्ही कॅमेऱ्यांवर कलर स्प्रे मारून चोरट्यांनी प्रवेश केला. स्थानिक ग्रामस्थांनी या घटनेची माहिती कन्नड ग्रामीण पोलिस ठाण्यास कळविली, पोलिस ठाण्याच्या सहाय्यक पोलिस निरीक्षक टी. आर. भालेराव, पोलिस उपनिरीक्षक राम बारहाते, बीट जमादार एच. व्ही. पठाण यांच्यासह छत्रपती संभाजीनगर ग्रामीण स्थानिक गुन्हे शाखेचे पथक, ठसेतज्ञ, श्वानपथक यांनी घटनास्थळी भेट देऊन, तपास सुरू केला.

भारतीय स्टेट बँक शाखा चापानेरचे शाखा प्रबंधक निशिकांत कडाळे यांच्या फिर्यादीवरून कन्नड ग्रामीण पोलिस ठाण्यात गुन्हा दाखल करण्यात आला आहे. कन्नड पोलिस पुढील तपास करीत आहेत.