जम्मू आणि काश्मीरमधील मतदानाचा टक्का वाढला, इथे विधानसभा कधी? राजीव कुमार म्हणाले…

नवी दिल्ली : केंद्रशासित प्रदेश असणाऱ्या जम्मू आणि काश्मीरमध्ये विधानसभा निवडणूक घेण्याच्या दृष्टीने लवकरच प्रक्रिया सुरू करण्यात येईल, अशी हमी मुख्य निवडणूक आयुक्त राजीव कुमार यांनी शनिवारी दिली. जम्मू आणि काश्मीरमधील नागरिकांना आपले सरकार निवडण्याचा अधिकार आहे, असेही ते म्हणाले.

सध्या सुरू असलेल्या लोकसभा निवडणुकीत जम्मू आणि काश्मीरमधील बहुतांश मतदारसंघात लक्षणीय प्रमाणात मतदान झाले. या पार्श्वभूमीवर तेथे विधानसभा निवडणूक कधी घेतली जाईल, अशी विचारणा पत्रकारांनी केली असता राजीव यांनी हे उत्तर दिले. जम्मू आणि काश्मीरमधील तरुण, महिला आदी सर्वजण अतिशय उत्साहाने मोठ्या संख्येने मतदानाला बाहेर पडले. तेथे लोकसहभाग वाढत आहे. लोकशाहीची मूळे आणखी खोलवर रूजत आहेत. त्यामुळे त्यांना आपले सरकार निवडण्याचा अधिकार आहे. त्यासाठी ते पात्र आहेत. तेथे विधानसभा निवडणूक घेण्याच्या दृष्टीने आवश्यक प्रक्रिया लवकरच सुरू केली जाईल, असे ते म्हणाले.

केंद्रीय निवडणूक आयोगातर्फे सार्वत्रिक निवडणुकीच्या वेळापत्रकाची घोषणा करण्यात आली तेव्हा राजीव यांना विधानसभा निवडणुकीबाबत विचारणा करण्यात आली होती. जम्मू आणि काश्मीरमध्ये लोकसभेसह विधानसभा निवडणूक का घेतली जात नाही असे विचारले असता, दळणवळणासंबंधी मुद्दे व सुरक्षेच्या कारणास्तव तेथे दोन्ही निवडणुका एकत्रित घेता येणार नाहीत, असे त्यांनी स्पष्ट केले होते.