Fact Check: बसपा प्रमुख मायावती यांनी भाजपला मत देण्याचं आवाहन केलं? जाणून घ्या व्हायरल व्हिडिओचं सत्य

नवी दिल्ली : देशभरात आज लोकसभा निवडणुकीच्या तिसऱ्या टप्प्यातील मतदान पार पडलं. यादरम्यान, सोशल मीडियावर बहुजन समाज पार्टीच्या राष्ट्रीय अध्यक्ष मायावती यांचा एक व्हिडिओ व्हायरल होत आहे. या व्हिडिओमध्ये त्या भाजपला मतदान करण्यासाठी सांगत असल्याचं बोललं जात आहे. व्हायरल व्हिडिओमध्ये यूपीच्या माजी मुख्यमंत्री मायावती असं म्हणताना ऐकू येतंय की, नरेंद्र मोदींनी तुम्हाला मोफत धान्य दिलं आहे, त्यामुळे तुम्हाला भाजपला मत देऊन याची परतफेड करायची आहे. निवडणुकीत भाजपला मतदान करुन त्यांचं हे ऋण तुम्हाला मतदान करुन फेडावं लागेल.

हा व्हिडिओ ट्विटरवर अनेक युजर्सनी शेअर केला आहे. हा व्हिडिओ BJP Barabanki (मोदी का परिवार) नावाच्या युजरने शेअर करत लिहिलंय, की मायावती यांनी भाजपला मत देण्याचं आवाहन केलं आहे. जय भाजपा, विजय भाजपा, जय श्रीराम. या पोस्टचं अर्काइव वर्जन इथे आणि इथे पाहता येऊ शकतं.

काय आहे व्हिडिओमागचं सत्य?

मात्र, सोशल मीडियावर व्हायरल होत असलेल्या या व्हिडिओची पडताळणी केली असता, तो अर्धवट असल्याचं समोर आलं. मूळ व्हिडिओमध्ये बसपा प्रमुख मायावती यांनी भाजप आणि आरएसएसवर नरेंद्र मोदी सरकारने दिलेल्या मोफत रेशनच्या नावावर मतं मागितल्याचा आरोप केला आहे.

लॉजिकल फॅक्ट्सने या व्हिडिओची पडताळणी केली आणि ४ मे २०२४ रोजी उत्तर प्रदेशातील आग्रा येथे आयोजित केलेल्या सार्वजनिक सभेचा व्हिडिओ आढळला. जिथे मायावती यांनी आग्रा लोकसभा मतदारसंघातून बसपा उमेदवार पूजा अमरोही यांचा प्रचार केला. त्यावेळचा हा व्हिडिओ एडिट करुन सोशल मीडियावर शेअर केला जात आहे. या व्हायरल व्हिडिओचा खरा व्हिडिओ बहुजन समाज पार्टीच्या यूट्यूब चॅनेलवर (आर्काइव) मिळाला. यात २६.११ या वेळेत भाषणातील व्हायरल होणारा भाग ऐकता येऊ शकेल.
Fact Check: कन्हैया कुमारने इस्लाम कुबूल केला? सोशल मीडियावर व्हायरल होणारा दावा खोटा
नरेंद्र मोदींनी तुम्हाला मोफत रेशन दिलं आहे, त्यामुळे हे ऋण तुम्हाला मतांच्या रूपाने फेडावं लागेल, भाजपला मतदान करून तुम्ही हे ऋण फेडा. त्यानंतर मायावती म्हणतात, पण मी अशा सर्व लोकांना, गरीब जनतेला सांगू इच्छिते की, केंद्रातील विद्यमान भाजप सरकारने गरीब जनतेला जे काही मोफत रेशन वगैरे दिलं आहे, ते भाजपने आपल्या खिशातून दिलेलं नाही. नरेंद्र मोदींनी स्वतःच्या खिशातून काहीही दिलेलं नाही. तुम्ही लोक यूपी सरकार किंवा केंद्र सरकारला जो काही कर भरता, त्या कराच्या पैशातून हे दिलं गेलं आहे. तो कर तुमचा आहे, हा कर जनता भरत आहे, त्यामुळे कर म्हणून तुम्ही जे पैसे भरता त्या पैशातून हे रेशन दिलं जात आहे. यामध्ये भाजपने कोणतेही उपकार केले नाही किंवा नरेंद्र मोदी यांचे कोणतेही उपकार किंवा ऋण नाही.

या टिप्पणीपूर्वी, मायावती मतं मिळवण्यासाठी भाजपच्या रणनीतींवर चर्चा करत असल्याचं ऐकायला मिळतं. २५.१६ मिनिटांवर त्या म्हणतात, अत्यंत गरीब कुटुंबांना मागील काही काळापासून तात्पुरत्या स्वरूपात जी काही खाद्यसामग्री मोफत दिली जात आहे, ते त्यांना कायमस्वरूपी लाभ देणारं नाही. इथे विधानसभेच्या निवडणुका झाल्या, विधानसभा निवडणुकीत आणि आता लोकसभा निवडणुकीतही देशभरातील गरीब लोक आहेत, ज्यांना त्यांनी काही मोफत रेशन दिलं आहे, त्याबदल्यात विधानसभा निवडणुकीतही जनतेची दिशाभूल झाली आणि आता लोकसभा निवडणुकीतही तसंच आहे.

बसपा प्रमुख मायावती भाषणादरम्यान भाजप आणि पंतप्रधान मोदींवर टीका करताना दिसत आहेत. त्यांनी भाजपला मतदान करण्यास सांगितलं नाही. टाईम्स ऑफ इंडियाच्या वृत्तानुसार, आपल्या भाषणादरम्यान मायावतींनी आरक्षणाच्या मुद्द्यावरून काँग्रेस आणि भाजपवर टीका केली आणि सरकारी नोकऱ्यांमध्ये पदोन्नतीमध्ये आरक्षण देण्याबाबत समाजवादी पक्षाला दोषी ठरवलं.

निष्कर्ष

मायावती यांच्या भाषणाचा एक छोटासा भाग खोटा दावा करून सोशल मीडियावर शेअर केला जात आहे. त्यांनी भाजपच्या समर्थनार्थ मतदान करण्यास सांगितलं नाही.

(This story was originally published by Logically Facts, and republished by MT as part of the Shakti Collective.)