Lok Sabha Elections 2024: सहाव्या टप्प्यासाठी उद्या मतदान, ५८ जागांसाठी ८८९ उमेदवार रिंगणात

म. टा. विशेष प्रतिनिधी, नवी दिल्ली : लोकसभा निवडणुकीच्या सहाव्या टप्प्याच्या प्रचारतोफा गुरुवारी संध्याकाळी ५ वाजता थंडावल्या. राष्ट्रीय राजधानी दिल्लीसह आठ राज्ये आणि केंद्रशासित प्रदेशांमधील लोकसभेच्या ५८ जागांसाठी शनिवारी (२५ मे) मतदान होणार आहे. यानंतर १ जून रोजी होणारा मतदानाचा अखेरचा टप्पाच बाकी राहील. पुढील महिन्याच्या पहिल्या मंगळवारी (४ जून) मतमोजणी व निकाल जाहीर होणार आहे. निवडणूक आयोग, राज्य पोलिस आणि निमलष्करी दलांतर्फे मतदान प्रक्रियेसाठीची पूर्वतयारी अंतिम टप्प्यात आहे.

भाजपने २०१९मध्ये या टप्प्याच्या एकूण ५८ पैकी ४० जागांवर कब्जा मिळविला होता. दुसऱ्या क्रमांकावरील बसपाने चार जागा जिंकल्या होत्या. यंदा दिल्लीतील सातपैकी सहा उमेदवारांची तिकिटे भाजपने कापली आहेत. शनिवारी होणाऱ्या मतदानात दिल्लीचे १ कोटी ५२ लाखांहून अधिक मतदार १६२ उमेदवारांचे राजकीय भवितव्य ठरवणार आहेत. दिल्लीतील सात जागांवर भाजप आणि आम आदमी पक्ष-काँग्रेसच्या इंडिया आघाडीमध्ये यंदा दुरंगी व विलक्षण चुरशीची लढत आहे.

उत्तर प्रदेश, बिहार, हरियाणा, झारखंड, ओडिशा, पश्चिम बंगाल, दिल्ली व जम्मू-काश्मिरातील या ५८ जागांवर मागील लोकसभा निवडणुकीत एकूण ६४.२२ टक्के मतदान झाले होते. पश्चिम बंगालमध्ये सर्वाधिक ८४.५९ टक्के, तर जम्मू-काश्मीरमध्ये सर्वात कमी ८.९८ टक्के मतदान झाले होते.

– या टप्प्यात विविध राज्यांत मिळून एकूण ८८९ उमेदवार रिंगणात
– सर्वाधिक २२३ उमेदवार हरियाणात आणि सर्वांत कमी २० उमेदवार जम्मू-काश्मीरमध्ये
– उत्तर प्रदेशातील १४, दिल्लीतील सर्व ७ व हरियाणातील सर्व १०, बिहार आणि पश्चिम बंगालमधील प्रत्येकी ८, ओडिशातील ६, झारखंडमधील ४ जागांबरोबरच जम्मू-काश्मीरमधील एका जागेसाठी होणार मतदान