Hajj Heatwave Deaths : हज यात्रेतील उष्माघाताच्या बळींची संख्या हजाराच्या जवळ पोहोचली, इतक्या भारतीयांचा समावेश

मक्का (सौदी अरेबिया) : मुस्लीम समुदायासाठी पवित्र असलेल्या सौदी अरबमधील मक्का येथे उष्णतेने कहर केला आहे. वाढत्या तापमानाच्या झळा जगभर बसत असताना यावेळी हज यात्रेसाठी गेलेल्या ९०० हून अधिक यात्रेकरुंना या भयानक उष्णतेने आपला जीव गमवावा लागला आहे. यामध्ये ६८ भारतीयांचा समावेश आहे. १२ ते १९ जून दरम्यान झालेल्या या यात्रेमध्ये यावेळी ५१.८ अंश इतकी रेकॉर्डब्रेक उष्णता नोंदविण्यात आली. याचा फटका जगभरातून मक्कामध्ये आलेल्या मुस्लिम यात्रेकरुंना बसला आहे.

सौदी अरेबियामधील मक्कामध्ये या पवित्र यात्रेसाठी जगभरातील १९ लाख लोक सहभागी झाले होते. आयुष्यात एकवेळी मक्कामध्ये आले पाहिजे ही जगभरातील मुस्लिमांची धार्मिक श्रद्धा असते. अनेक अबाल,वृद्ध मक्कातील जीवघेण्या उष्णतेमध्ये धार्मिक स्थळाला भेट देण्यासाठी आले होते. यापैकी ९०० हून अधिक लोकांचा सोमवारी उष्माघाताने मृत्यू झाल्याचे सांगितले जात आहे. या मृत्यूच्या तांडवाने मक्का परिसरात हाहाकार उडाल्याचे सांगितले जात आहे. लोक जिकडे तिकडे आपल्या नातेवाईकांना शोधण्यासाठी रुग्णालयांमध्ये गर्दी करत आहेत. तसेच समाजमाध्यमांवरही लोक तेथील जीवघेण्या परिस्थितीत आपल्या प्रियजनांसाठी मदतीची याचना करत आहेत.
Hajj Yatra : मक्केत उष्णतेचा पारा 52 अंशावर, उष्णतेमुळे ५५० हून अधिक हज यात्रेकरूंचा झाला मृत्यू

मृतांमध्ये ६८ भारतीय

आंतरराष्ट्रीय माध्यमांनी व सौदी अरेबियातील अधिकाऱ्यांनी दिलेल्या माहितीनुसार या मृतांमध्ये 68 भारतीयांचा समावेश आहे. याबद्दल सौदी मधील अधिकाऱ्यांनी सांगितले की, ‘यातील काही मृत्यू हे नैसर्गिक होते. यात्रेमध्ये अनेक वृद्धांचाही समावेश होता. तसेच यातील काही मृत्यू हे बदललेल्या वातावरणामूळे झाले आहेत असे आम्हाला वाटते.’ हज कमिटी ऑफ इंडिया यांनी जाहीर केलेल्या आकडेवारीनुसार मागील वर्षी १३९४२९ भारतीयांनी हज यात्रेत सहभाग घेतला होता.

इजिप्तच्या नागरिकांचा सर्वाधिक मृत्यू

मक्कातील या मृतांमध्ये इजिप्तमधील भाविकांची संख्या सर्वाधिक असल्याचे सांगण्यात येत आहे. अरबचे अधिराऱ्यांनी माध्यमांना दिलेल्या माहितीनुसार उष्माघाताने झालेल्या या आकडेवारीमध्ये इजिप्तमधील मृत्यूंची संख्या आता ३०० वरुन ६०० वर पोहोचली आहे. इजिप्तबरोबरच यात जॉर्डन,ईरान,इंडोनेशिया,ट्युनिशिया,सेनेगल आणि इराक मधील नागरीकांचा समावेश आहे. सौदी ने सांगितलेले हे आकडे अधिकृत नसून यापेक्षा अधिक मृत्यू झाल्याचे बोलले जात आहे.

जागतिक तापमानवाढीचा चटके सगळ्या देशांना बसत आहेत. सौदी अरेबियामधील एका अभ्यासानुसार हज भागातील तापमान प्रतिवर्षी ०.४ अंश सेल्सियस ने वाढत आहे. हे वाढते तापमान २०४७ ते २०५२ पर्यंत अतिसंवेदनशील स्थितीपर्यंत पोहोचू शकते असे सांगण्यात येत आहे.