सार्वजनिक बांधकाम नागपूर प्रादेशिक विभागाअंतर्गत कामांचा महसूलमंत्री चंद्रशेखर बावनकुळे यांच्याकडून आढावा – महासंवाद

मुंबई, दि. २२:  सार्वजनिक बांधकाम नागपूर प्रादेशिक विभाग अंतर्गत करण्यात येत असलेल्या कामांना अधिकचा निधी उपलब्ध व्हावा यासाठी मंत्रालय स्तरावर पाठविण्यात आलेल्या प्रस्तावांना मान्यता  मिळण्यासाठी विभागाने पाठपुरावा करावा, अशा सूचना महसूल मंत्री चंद्रशेखर बावनकुळे यांनी  सार्वजनिक बांधकाम प्रादेशिक विभाग नागपूर अंतर्गत कामांचा आढावा घेताना दिल्या.

महसूल मंत्री चंद्रशेखर यांनी सार्वजनिक बांधकाम प्रादेशिक विभाग, नागपूर अंतर्गत कामांचा आढावा घेतला. या बैठकीस सार्वजनिक बांधकाम मंत्री बांधकाम मंत्री शिवेंद्रसिंह भोसले, सचिव संजय दशपुते, नागपूर विभागाचे मुख्य अभियंता दिनेश नंदनवार, नागपूर सार्वजनिक बांधकाम मंडळाचे अधीक्षक अभियंता जनार्दन भानुसे  यांच्यासह संबधित अधिकारी उपस्थित होते.

मंत्री श्री. बावनकुळे म्हणाले,  प्रशासकीय मान्यता व निधीअभावी विकासकामे  थांबू नयेत. यासाठी क्षेत्रीय स्तरावरील अधिकाऱ्यांनी विभाग व मंत्रालय स्तरावर पाठपुरावा करावा. तसेच नागपूर येथील आमदार निवास, आयएएस आयपीएस, अधिकाऱ्यांसाठी निवास इमारत, नागभवन इमारत आणि सार्वजनिक बांधकाम विभागासाठी नवीन प्रशासकीय इमारत याबाबतचा  प्रस्ताव सादर करावा, अशा सूचना त्यांनी दिल्या.