पुण्यात पोलीस कर्मचाऱ्याकडून लग्नास नकार देत महिलेची फसवणूक; पोलिस कर्मचारी निलंबित, ५ लाख सोन्याच्या दागिन्यांचा अपहार

पुणे – सामान्य नागरिकांकडून महिलांची फसवणूक होणे सर्वसामान्य बाब आहे, परंतु रक्षणाची जबाबदारी असलेल्या पोलीसांकडूनच फसवणूक होत असेल तर विश्वास कुणावर ठेवावा असा प्रश्न उपस्थित होत आहे. पुण्यात महिलेची फसवणूक केल्याप्रकरणी पुणे पोलिस दलातील कर्मचाऱ्याचे निलंबन करण्यात आले आहे. संबंधित महिलेला लग्नास नकार देत पोलिस कर्मचाऱ्याने फसवणूक केली आहे. महिलेसोबत नातं ठेवत तिच्या पतीच्या विमा पॉलिसीचे ५ लाख व सोन्याच्या दागिन्यांचा अपहार केला आहे. याप्रकरणी पुण्यातील समर्थ पोलीस ठाण्यातील कर्मचाऱ्यावर गुन्हा दाखल करण्यात आला आहे. तुषार अनिल सुतार असे या पोलीस शिपायाचे नाव असून तो खडक पोलीस ठाण्यात नेमणूकीला होता. दरम्यान, एका आठवड्यात पुणे पोलिस दलातील दुसरा पोलिस कर्मचारी निलंबित झाला आहे.पोलिसांनी दिलेल्या माहितीनुसार, याप्रकरणातील फिर्यादी महिला त्यांच्या कुटुंबासह रास्ता पेठेत वास्तव्यास होत्या. ४ वर्षांपूर्वी तुषार सुतार याच्याबरोबर सोशल मीडियावरून त्यांची ओळख झाली आणि त्याचे रूपांतर प्रेमात झाले. फिर्यादी महिला व तुषार यांच्याबाबत पतीला कळल्या नंतर पतीने त्या महिलेला घराबाहेर काढले. तुषार व फिर्यादी महिला तिच्या मुलीसह सुमारे तीन वर्षे आंबेगाव येथे एकत्र रहात होते. त्यानंतर २०२१ मध्ये फिर्यादी महिलेच्या पतीचे निधन झाले. त्यानंतर त्याच्या पॉलिसीचे ९ लाख रुपये या महिलेला मिळाले. या पैशांपैकी तुषार याने वेगवेगळी कारणे सांगून तिच्याकडून ५ लाख रुपये व २२ ग्रॅम सोन्याचे दागिने घेतले.दरम्यान, फिर्यादी महिलेनं तुषार यांच्याकडे लग्नाबाबत विचारणा केली असता त्याने वेगवेगळी कारणे देत टाळाटाळ केली. काही काळानंतर सुतार यांनी तिला मारहाण व शिवीगाळ करुन लग्नास नकार दिला. अखेर तिने समर्थ पोलीस ठाण्यात फिर्याद दिली आहे. त्यानंतर पोलिस उपायुक्त संदीप गिल यांनी या कर्मचाऱ्याचे निलंबन केले असून पोलीस या प्रकरणी अधिक तपास करीत आहेत.