पीडित मुलीचे कुटुंब ठाणे येथे वास्तव्यास आहे. मे महिन्यात लोकसभा निवडणुकीदरम्यान मतदान करण्यासाठी तिची आई मुंबईत आली होती. यावेळी आईने आपल्या लेकीला बहिणीच्या घरी सोडलं होतं. आणि नेमकं याच दिवशी बहिणीच्या पतीनेही सुट्टी घेतली होती आणि घरात कोणी नसल्याची संधी साधत या नराधमाने चिमुकलीवर लैंगिक अत्याचार केला.
या घृणास्पद प्रकारामुळे भयभीत झालेल्या मुलीने ही गोष्ट तिच्या आईपासून लपवून ठेवली होती. नंतर याच आरोपीच्या मुलाचा वाढदिवस होता. त्यादिवशी या दोघींनाही आमंत्रित करण्यात आले. त्याच घरात पुन्हा जायचं का या विचाराने मुलगी पुन्हा भयभीत झाली. ती म्हणाली मला पुन्हा तिथे जायचं नाही. आईने तिला याबद्दल विचारले असता तिने आईला घडलेली घटना सांगितली. मुलीचे आई वडिलांना हे ऐकून धक्का बसला आणि त्यांनी तात्काळ पोलीस स्टेशन मध्ये जाऊन याबाबत तक्रार नोंदवली.
मुलींच्या पालकांच्या तक्रारीची दखल घेत पोलिसांनी या नराधमाला रविवारी सकाळी अटक केली आहे. आणि त्याच्याविरोधात आरोपीवर भारतीय दंड संहितेनुसार बलात्कार, धमकी देणे आणि लैंगिक गुन्ह्यांपासून बालकांचे संरक्षण अंतर्गत गुन्हा नोंदवला आहे. आरोपीने परिसरातील इतर मुलींनाही अशाप्रकारे लक्ष्य केले असल्याची पोलिसांना शंका आहे. याबाबत पोलीस पुढील तपास करत आहेत. या अल्पवयीन मुलीची वांद्रे येथील भाभा रुग्णालयात वैद्यकीय तपासणी करण्यात आली आहे.
नुकताच कल्याण मधील बलात्कार प्रकरण आणि उरण हत्या प्रकरण समोर आले होते. महिलांवरील अत्याचाराच्या या घटनेने मन सुन्न होते. या घटनेमुळे लोकांनी आक्रोश केल्याचे पाहायला मिळाले. यातच आता ही घटना समोर आली आहे. यामुळे महिला सुरक्षेचा प्रश्न पुन्हा ऐरणीवर आला आहे.