पूजा खेडकर यांची वाशिम येथे बदली झाल्यानंतर पुण्याचे जिल्हाधिकारी सुहास दिवसे यांनी त्यांच्यावर गंभीर आरोप केले होते. त्यानंतर दिवसे यांनी पोलिसांकडे तक्रार देखील केली होती. या प्रकरणी पुणे पोलिसांनी खडेकर यांना त्यांचे म्हणणे मांडण्यासाठी आतापर्यंत ३ वेळा समन्स पाठवला आहे पण त्या एकदाही आल्या नाहीत.
पुणे पोलिसांच्या संपर्कात नाही
पुणे पोलिसांनी दिलेल्या माहितीनुसार पूजा खेडकर यांचा नंबर नॉट रिचेबल आहे. त्यांना फोन लागत नाही. त्यामुळे संपर्क होत नसल्याचे पोलिसांनी सांगितले. काही दिवसांपूर्वी केंद्र सरकारने पूजा खेडकर यांच्या आई-वडिलांच्या वैवाहिक स्थितीचा रिपोर्ट पुणे पोलिसांकडे मागितला होता. त्यावर पुणे पोलिसांनी पूजा खेडकर यांच्या आई-वडिलांचा घटस्फोट झाल्याचे सांगितले होते. एका मुलाखतीत पूजा यांनी आपण वडिलांसोबत राहत नसल्याचे म्हटले होते.
पूजा खेडकर यांची आई मनोरमा यांना पिस्तूलाने शेतकऱ्यांना धमकावल्याबद्दल पोलिसांनी काही दिवसांपूर्वी अटक केली होती. युपीएससीकडून गुन्हा दाखल झाल्यानंतर पूजा खेडकर यांनी आपले मत कोर्टासमोर मांडू असे म्हटले होते.
या सर्व घटनांच्या दरम्यान पूजा खेडकर यांचे वडील दिलीप खेडकर यांचे एक प्रकरण समोर आले आहे. त्यांनी बारामतीत नाव बदलून जमीन खरेदी केल्याचे समोर आले आहे. दिलीप खेडकर यांनी नाव का बदलले? त्यांनी प्रशासनाला का फसवले? त्यांचा हेतू काय होता? याबाबत आता पुणे एबीसी चौकशी करत आहे. याआधी पूजा खेडकर यांच्यावर देखील नाव बदलून युपीएससी परीक्षा अधिक वेळा दिल्याचा आरोप करण्यात आला आहे ज्याची सध्या चौकशी सुरू आहे.