Aroshi Mishra Case: प्रेयसीला इमारतीवरुन ढकललं, साताऱ्यातल्या आरोशीच्या हत्येचं गूढ उलगडलं

सातारा : कराड शहरानजीक मलकापुरात एका प्रियकराने प्रियसीला इमारतीवरुन ढकलून दिल्याची धक्कादायक घटना घडल्याचे बुधवारी समोर आलं आहे. आरोशी मिश्रा (वय २१) असं तरुणीचं नाव असून तिचा जागीच मृत्यू झाला आहे. हरियाणा येथील सोनिपत येथील ध्रृव छिक्कार असे आरोपी प्रियकराचे नाव आहे. आरोपी ध्रृव याच्यावर रुग्णालयात उपचार सुरु असल्यामुळे त्याला अद्याप अटक करण्यात आलेली नाही.याबाबत अधिक माहिती अशी की, प्रियकर आणि प्रेयसी कराड शहरानजीक असलेल्या मलकापूर येथील कृष्णा मेडीकल कॉलेजमध्ये पहिल्या वर्षात शिक्षण घेत होते. प्रेयसी आरोशी आणि ध्रृव असे दोघे दिल्लीत एकत्र शिक्षण घेत होते. तेव्हापासून या दोघांचे एकमेकावर प्रेम होते. त्यानंतर त्यांनी एकत्रच कराडातील कृष्णा मेडीकल कॉलेजमध्ये प्रवेश घेतला. ध्रृव हा कृष्णा मेडीकल कॉलेजच्या जवळ असलेल्या सनसिटी बिल्डींगमध्ये राहत होता.
Satara News: MBBSच्या विद्यार्थिनीचा इमारतीवरुन पडून मृत्यू; प्रकरणात बड्या व्यक्तीचं नाव? गूढ वाढलं

ध्रृवने आरोशीला आपल्या फ्लॅटवर बोलावून घेतले होते. “तुझे दुसऱ्या मुलासोबत प्रेमसंबध आहेत,” असे म्हटल्यानंतर प्रियकर ध्रृव आणि आरोशी या दोघांमध्ये सुरुवातीला वादावादी झाली. त्यानंतर प्रियकर ध्रृव आणि आरोशी यांच्यात झटपट झाली. या झटापटीत दुसऱ्या मजल्यावरुन ध्रुवने धक्का दिल्याने आरोशी खाली पडली आणि तिचा जागीच मृत्यू झाला. यावेळी त्या दोघांच्यात झालेल्या झटापटीत ध्रृवही जखमी झाला आहे.

त्याचा पाय मोडला असून त्याच्यावर रुग्णालयात उपचार सुरु आहे. रात्री उशीरा या आरोशीची आई कराडमध्ये दाखल झाल्यानंतर मध्यरात्री १०३ (१) प्रमाणे ध्रृववर गुन्हा दाखल करण्यात आला. आरोपी ध्रृव याच्यावर रुग्णालयात उपचार सुरु असल्यामुळे त्याला अद्याप अटक करण्यात आलेली नाही.

दरम्यान, या दुर्दैवी घटनेनंतर परप्रांतातील एका मोठ्या व्यक्तीच्या नावाची चर्चा सुरू आहे. त्यामुळे पोलिसांकडून या प्रकरणाचा सखोल तपास सुरू असून, सर्व शक्यता तपासल्या जात असल्याचे पोलिसांकडून सांगितले जात आहे. तरुणीच्या शवविच्छेदनाची प्रक्रिया सुरू असताना पोलीस बंदोबस्त ठेवण्यात आला होता. मात्र, अधिकृत माहिती समोर न आल्याने तर्कविर्तकांना उधाण आले आहे.