लाँग वीकेंडचा फायदा
गेल्या काही दिवसात बॉक्स ऑफिसवर नवा चित्रपट प्रदर्शित झालेला नाही, पण आता एकाच वेळी अनेक चित्रपट प्रदर्शित होत आहेत. १५ ऑगस्ट रोजी बॉलिवूड आणि साऊथ सिनेविश्वातील मिळून हे ५ बडे चित्रपट प्रदर्शित होणार आहेत. पाच मोठ्या चित्रपटांच्या टक्करबद्दल आश्चर्य व्यक्त करताना, दिल्लीतील डिलाइट सिनेप्लेक्सचे महाव्यवस्थापक राजकुमार मेहरोत्रा यांनी अशी प्रतिक्रिया व्यक्त केली की, ‘अनेक महिने चित्रपट प्रदर्शित होत नव्हते आणि आता एकाच वेळी पाच चित्रपट प्रदर्शित होत आहेत. १५ ऑगस्ट ही रिलीज डेट बॉलिवूड चित्रपटांसाठी नेहमीच लकी मानली जाते. या काळात मुलांच्या परीक्षा संपतातच, शिवाय सणांमुळे मोठे वीकेंडही असतात. म्हणूनच सर्व चित्रपट निर्मात्यांना त्यांचे चित्रपट या तारखेला प्रदर्शित करायचे आहेत.’
निर्माता आणि चित्रपट व्यवसाय विश्लेषक गिरीश जोहर यांनी अशी प्रतिक्रिया दिली की, ‘आधी जेव्हा या क्लॅशबद्दल बोलले गेले, तेव्हा वाटलेले की काही चित्रपट पुढे ढकलले जातील, पण आता सगळे चित्रपट येत आहेत. चित्रपटसृष्टीतील लोकांना इतके चित्रपट प्रदर्शित करणे सोपे जाणार नाही आणि चित्रपट वितरकांमध्ये अधिक स्क्रीन्ससाठी भांडण होतील, मात्र इतके चित्रपट प्रदर्शित झाल्याने प्रेक्षकांना फारसा फरक पडत नाही. चित्रपटाचा आशय त्यांच्यासाठी सर्वात महत्त्वाचा आहे. ज्या चित्रपटात ताकद आहे तो सिनेमा सर्वाधिक प्रेक्षक पाहतील. जो कमकुवत आहे तो मोठ्या स्पर्धेत आपोआप मागे राहील.’
या चित्रपटांची होणार टक्कर
स्त्री २
खेल खेल में
वेदा
थांगलान
डबल इस्मार्ट
दोन मराठी अभिनेत्रींचे सिनेमे भिडणार
श्रद्धा कपूरचा ‘स्त्री २’ आणि शर्वरी वाघचा ‘वेदा’ या १५ ऑगस्ट रोजी प्रदर्शित होणार असल्याने दोन मराठमोळ्या अभिनेत्रींचे बॉलिवूड चित्रपट आमनेसामने आहेत.