संतोष रविवारी त्याची ई-रिक्षा घेऊन बुटीबोरीच्या दिशेने निघाला होता. त्यावेळी त्याच्या सोबत त्याची गर्लफ्रेंड नलूही होती असे सांगण्यात येत आहे. मात्र, नियोजनानुसार राहुल गायकवाड हाही त्यांचा मागे मोपेडवरून येत होता. संधी साधून दोघांनी संतोषला मोहगावजवळील साई लीला ले-आऊटमधील मोकळ्या जागेत नेऊन सत्तूरने गळा चिरून हत्या केली.
या हत्येनंतर दोन्ही आरोपी तेथून पळून पुन्हा नागपुरात आले. संतोष हा महिलेचा जुना प्रियकर होता, त्याने महिलेला इतर कोणाशीही संबंध ठेवण्यास आणि बोलण्यास मनाई केल्याचे सांगितले जात आहे. दरम्यान, आरोपी राहुलसोबत तिचे प्रेमसंबंध निर्माण झाले होते. मात्र त्यांचा प्रेमात संतोष अडथळा निर्माण करत असल्याने त्यांनी त्याची हत्या करण्याचा कट रचला.
रविवारी दुपारी एक मेंढपाळा आपले जनावरे चरायला घेऊन जात असताना त्याला बुटीबोरी पोलिस स्टेशन अंतर्गत मोहगाव येथील साई लिला ले-आऊट परिसरात एक मृतदेह गळा चिरलेला अवस्थेत पडलेला पाहिल्यानंतर पोलिसांना माहिती देण्यात आली. पोलिसांनी मृतकाची ओळख पटवून आरोपीचा शोध सुरू केला. तपासादरम्यान पोलिसांना सीसीटीव्ही फुटेज मिळाले आणि या सुगावानंतर पोलिसांनी दोन्ही आरोपींना अटक केली आहे. मोहगाव परिसरात नव्याने लेआउट तयार करण्यात आले आहे. त्यामुळे या परिसरात बांधकाम नसल्याने बहुतांश लेआउट मोकळे असल्याने स्थानिक गुराखी त्या भागात त्यांची जनावरे चारायला घेऊन जात असतात. नागपूर ग्रामीण स्थानिक गुन्हे शाखेच्या पोलिसांनी ही कारवाई केली आहे.