दोन महिन्यांत काम सुरू?
नगर रस्त्यावरील वाहतूक कोंडी हा कळीचा मुद्दा बनला आहे. त्यासाठी शास्त्रीनगर चौकात उड्डाणपूल आणि भुयारी मार्ग प्रस्तावित करण्यात आला आहे. या दोन्ही प्रकल्पांसाठी ९७ कोटी रुपये खर्च अपेक्षित असून, त्याला एस्टिमेट कमिटीत मान्यता देण्यात आली आहे. या ठिकाणी विकास प्रकल्प करताना पुरातत्त्व विभागाच्या परवानगीची अडचण येत होती. या विभागाकडून मे महिन्यात या प्रकल्पांना मान्यता देण्यात आली. त्यानंतर उड्डाणपुलाचा आणि भुयारीमार्गाचा आराखडा तयार करण्यात आला असून, त्याला एस्टिमेट कमिटीत मान्यता देण्यात आल्याने या प्रकल्पाचे काम येत्या दोन महिन्यांत सुरू होईल, असे अपेक्षित आहे.
सहा पदरी भुयारी मार्ग
शास्त्रीनगर चौकात सहा पदरी भुयारी मार्ग प्रस्तावित करण्यात आला आहे. येरवड्याकडून खराडीकडे; तसेच पुणे शहराच्या दिशेने जाण्यासाठी प्रत्येकी तीन लेन तयार करण्यात येणार आहेत. या भुयारी मार्गासाठी ३७ कोटी रुपये खर्च अपेक्षित आहे. खराडी-विमाननगरकडून गोल्फ क्लबकडे जाण्यासाठी दोन पदरी उड्डाणपूल प्रस्तावित करण्यात आला आहे. या उड्डाणपुलासाठी २६ कोटी रुपये खर्च अपेक्षित आहे. या व्यतिरिक्त चौकात करण्यात येणाऱ्या इतर उपाययोजनांसाठी १८ कोटी रुपये खर्च अपेक्षित असल्याची माहिती टिंगरे यांनी दिली.
नगर रस्त्यावरील वाहतूक कोंडी फोडण्यासाठी विशेष प्रयत्न करण्यात येत आहेत. येरवडा ते विमाननगरपर्यंतची बीआरटी काढण्यात आल्याने वाहनचालकांना मोठा दिलासा मिळाला आहे. आता शास्त्रीनगर चौकातील उड्डाणपूल; तसेच भुयारी मार्गाचे काम झाल्याने या चौकातील कोंडी फुटेल. रामवाडी ते शिरूरदरम्यान दुहेरी उड्डाणपुलाचे काम झाल्यानंतर संपूर्ण नगर रस्ता सिग्नलमुक्त झालेला असेल, असे आमदार सुनील टिंगरे म्हणाले आहेत.