म. टा. विशेष प्रतिनिधी, नाशिक : आधीच महापालिका आयुक्त डॉ. अशोक करंजकर रजेवर गेले असताना आता पालिकेतील प्रमुख अधिकारीही सिंहस्थाच्या नियोजनासाठी उज्जैन दौऱ्यावर असल्याने पालिकेत शुक्रवारी ‘सन्नाटा’ पाहायला मिळाला. आयुक्त रजेवर अन् अधिकारी दौऱ्यावर असल्यामुळे, तसेच आज, शनिवारपासून सलग तीन दिवस सुट्यांमुळे शुक्रवारी बहुतांश कर्मचाऱ्यांनीही हजेरी भरून काढता पाय घेतला. परिणामी तक्रारी, तसेच अन्य कामांसाठी आलेल्या नागरिकांना रिकाम्या हातानेच परतावे लागले. त्यामुळे अधिकारी दौऱ्यावर, नागरिक वाऱ्यावर, अशी स्थिती दिसून आली.
नाशिक आणि त्र्यंबकेश्वरमध्ये सन २०२६-२७ मध्ये होत असलेल्या सिंहस्थाच्या नियोजनासाठी उज्जैनच्या दौऱ्यावर गेलेल्या महापालिकेच्या शिष्टमंडळाने शुक्रवारी ‘महाकाल लोक कॉरिडॉर’ आणि सिप्रा नदीवरील घाटांची पाहणी केली. उज्जैन स्मार्ट सिटीच्या कार्यालयाला भेट देऊन सिंहस्थाच्या नियोजनाची माहिती घेतली. सिंहस्थानिमित्त लाखो साधू-महंत व कोट्यवधी भाविक नाशिकमध्ये येणार आहेत. त्यांच्यासाठी विविध पायाभूत सुविधांची निर्मिती करण्याची जबाबदारी महापालिकेची आहे. त्यासाठी महापालिकेने तब्बल आठ हजार कोटींचा सिंहस्थ आराखडा तयार करीत हा प्रारूप सिंहस्थ आराखडा जिल्हाधिकारी, तसेच विभागीय आयुक्तांना सादर केला आहे. विभागीय आयुक्त डॉ. प्रवीण गेडाम यांनी सिंहस्थाचे नियोजन हाती घेतले असून, त्यांनी नाशिक महापालिका व त्र्यंबक नगरपालिकेतील अधिकाऱ्यांना उज्जैनमध्ये होणाऱ्या सिंहस्थ कामांची पाहणी करण्याचे निर्देश दिले होते. त्यानुसार नाशिक महापालिकेचे अतिरिक्त आयुक्त प्रदीप चौधरी, स्मिता झगडे, शहर अभियंता संजय अग्रवाल, अधीक्षक अभियंता अविनाश धनाईत, नगररचनाचे कार्यकारी अभियंता प्रशांत पगार, घनकचरा व्यवस्थापन विभागाचे संचालक डॉ. आवेश पलोड, कार्यकारी अभियंता रवींद्र धारणकर, संदेश शिंदे, रवी बागूल आदी अधिकारी शुक्रवारपासून दोन दिवसांच्या उज्जैन दौऱ्यावर आहेत. शुक्रवारी या शिष्टमंडळाने उज्जैनमधील ‘महाकाल लोक कॉरिडॉर’ची पाहणी केली. सोबतच महाकाल ट्रस्टला भेट देऊन सन २०१६ मधील नियोजन आणि सन २०२८ च्या सिंहस्थासाठी सुरू असलेल्या तयारीचा आढावा घेतला. उज्जैनमधील सीसीटीव्ही कंट्रोल रूम आणि उज्जैन स्मार्ट सिटीच्या कार्यालयाला भेट देऊन तेथील तयारीचा आढावा घेतला.
रिकाम्या हातानेच परतले नागरिक
आयुक्त डॉ. करंजकर रजेवर असल्यामुळे पालिकेचा प्रभारीपदाचा कार्यभार जिल्हाधिकारी जलज शर्मांकडे आहे. दुसरीकडे पालिकेचे प्रमुख अधिकारी उज्जैन दौऱ्यावर असल्यामुळे पालिकेचा कारभार शुक्रवारी रामभरोसे होता. आयुक्त रजेवर, अधिकारी दौऱ्यावर असल्यामुळे नागरिक मात्र वाऱ्यावर असल्याचे चित्र होते. अधिकारी नसल्याने कर्मचाऱ्यांनीही हजेरी भरून पालिकेतून काढता पाय घेतल्यामुळे पालिकेत शुकशुकाट होता. शनिवार, रविवार, सोमवार अशा सलग सुट्या असल्यामुळे अनेक कर्मचारी शुक्रवारीच गायब झाले. त्यामुळे आपल्या तक्रारींसह कामांसाठी आलेल्या नागरिकांना रिकाम्या हातानेच परतावे लागल्याने अनेकांनी नाराजी व्यक्त केली.
नाशिक आणि त्र्यंबकेश्वरमध्ये सन २०२६-२७ मध्ये होत असलेल्या सिंहस्थाच्या नियोजनासाठी उज्जैनच्या दौऱ्यावर गेलेल्या महापालिकेच्या शिष्टमंडळाने शुक्रवारी ‘महाकाल लोक कॉरिडॉर’ आणि सिप्रा नदीवरील घाटांची पाहणी केली. उज्जैन स्मार्ट सिटीच्या कार्यालयाला भेट देऊन सिंहस्थाच्या नियोजनाची माहिती घेतली. सिंहस्थानिमित्त लाखो साधू-महंत व कोट्यवधी भाविक नाशिकमध्ये येणार आहेत. त्यांच्यासाठी विविध पायाभूत सुविधांची निर्मिती करण्याची जबाबदारी महापालिकेची आहे. त्यासाठी महापालिकेने तब्बल आठ हजार कोटींचा सिंहस्थ आराखडा तयार करीत हा प्रारूप सिंहस्थ आराखडा जिल्हाधिकारी, तसेच विभागीय आयुक्तांना सादर केला आहे. विभागीय आयुक्त डॉ. प्रवीण गेडाम यांनी सिंहस्थाचे नियोजन हाती घेतले असून, त्यांनी नाशिक महापालिका व त्र्यंबक नगरपालिकेतील अधिकाऱ्यांना उज्जैनमध्ये होणाऱ्या सिंहस्थ कामांची पाहणी करण्याचे निर्देश दिले होते. त्यानुसार नाशिक महापालिकेचे अतिरिक्त आयुक्त प्रदीप चौधरी, स्मिता झगडे, शहर अभियंता संजय अग्रवाल, अधीक्षक अभियंता अविनाश धनाईत, नगररचनाचे कार्यकारी अभियंता प्रशांत पगार, घनकचरा व्यवस्थापन विभागाचे संचालक डॉ. आवेश पलोड, कार्यकारी अभियंता रवींद्र धारणकर, संदेश शिंदे, रवी बागूल आदी अधिकारी शुक्रवारपासून दोन दिवसांच्या उज्जैन दौऱ्यावर आहेत. शुक्रवारी या शिष्टमंडळाने उज्जैनमधील ‘महाकाल लोक कॉरिडॉर’ची पाहणी केली. सोबतच महाकाल ट्रस्टला भेट देऊन सन २०१६ मधील नियोजन आणि सन २०२८ च्या सिंहस्थासाठी सुरू असलेल्या तयारीचा आढावा घेतला. उज्जैनमधील सीसीटीव्ही कंट्रोल रूम आणि उज्जैन स्मार्ट सिटीच्या कार्यालयाला भेट देऊन तेथील तयारीचा आढावा घेतला.
रिकाम्या हातानेच परतले नागरिक
आयुक्त डॉ. करंजकर रजेवर असल्यामुळे पालिकेचा प्रभारीपदाचा कार्यभार जिल्हाधिकारी जलज शर्मांकडे आहे. दुसरीकडे पालिकेचे प्रमुख अधिकारी उज्जैन दौऱ्यावर असल्यामुळे पालिकेचा कारभार शुक्रवारी रामभरोसे होता. आयुक्त रजेवर, अधिकारी दौऱ्यावर असल्यामुळे नागरिक मात्र वाऱ्यावर असल्याचे चित्र होते. अधिकारी नसल्याने कर्मचाऱ्यांनीही हजेरी भरून पालिकेतून काढता पाय घेतल्यामुळे पालिकेत शुकशुकाट होता. शनिवार, रविवार, सोमवार अशा सलग सुट्या असल्यामुळे अनेक कर्मचारी शुक्रवारीच गायब झाले. त्यामुळे आपल्या तक्रारींसह कामांसाठी आलेल्या नागरिकांना रिकाम्या हातानेच परतावे लागल्याने अनेकांनी नाराजी व्यक्त केली.