राज ठाकरे काय म्हणाले?
बदलापूरमध्ये जी अत्यंत दुर्दैवी आणि भीषण घटना घडली, त्यावर मी काल पण म्हणलं तसं, यावर कारवाई व्हायला इतका वेळ का लागला? या विषयाला महाराष्ट्र नवनिर्माण सेनेच्या माझ्या महिला पदाधिकाऱ्यांनी वाचा फोडली, विषय लावून धरला, आणि त्यातून जनआक्रोशाला तोंड फुटलं.
मुळात हा महाराष्ट्राच्या मुख्यमंत्र्यांचा जिल्हा. या जिल्ह्यातच जर कायदा धाब्यावर बसवला जात असेल तर बाकी ठिकाणची परिस्थिती काय असेल याची कल्पना पण करवत नाही.
आज सरकार ‘लाडकी बहीण’ योजनेच्याद्वारे स्वतःच कौतुक करून घेण्यात मग्न आहे, पण जर तुमची बहीण खरंच लाडकी असेल तर तिच्यावर अशी वेळ येऊ नये आणि दुर्दैवाने आलीच तर तिला न्याय मिळेल हे पाहणं, हे पहिलं कर्तव्य नाही का ? असा सवाल राज ठाकरेंनी विचारला आहे.
जनतेच्या पैशातून, बहिणींना पैसे देऊन, स्वतःचं ब्रॅण्डिंग करण्यापेक्षा ती सुरक्षित आहे,ही भावना जरी निर्माण केलीत तरी खूप आहे. माझ्या पक्षाच्या महिला पदाधिकाऱ्यांमुळे हा विषय आज समोर आलाय याचा मला अभिमान आहे. पण मुळात असे प्रकार घडू नयेत यासाठी कडक कायदे आणि त्याची अंमलबजावणी होणं गरजेचं आहे.
बदलापूर लैंगिक अत्याचार
दरम्यान, बदलापूर शहरात लहान मुलींवरील अत्याचार प्रकरणी वातावरण तापले असताना आणि शाळेबाहेर आंदोलन होणार असल्याची कल्पना असूनही आंदोलन हिंसक होईल, याची कल्पना पोलिसांना नव्हती, असे आता समोर आले आहे. तसेच आंदोलनासंदर्भातील सोशल मीडिया आणि अन्य माध्यमातून नागरिकांना आवाहन करण्यात येत असतानाही पोलिसांनी याकडे दुर्लक्ष केल्याची शक्यता व्यक्त केली जात आहे.