विधानसभा निवडणुकीच्या पार्श्वभूमीवर महायुती सरकारने लाडकी बहीण योजना आणली आहे. या योजनेच्या प्रचारानिमित्त शुक्रवारी तपोवनातील मोदीम मैदानात आज, शुक्रवारी दुपारी दोन वाजता महिला सशक्तीकरण महाशिबिर होत आहे. या मेळाव्यात जवळपास ५० हजार महिला उपस्थित राहणार आहेत. या कार्यक्रमाला मुख्यमंत्री शिंदेंसह दोन्ही उपमुख्यमंत्री, सार्वजनिक बांधकाम मंत्री तथा पालकमंत्री दादा भुसे, ग्रामविकास मंत्री गिरीश महाजन, अन्न व नागरी पुरवठा मंत्री छगन भुजबळ, पाणीपुरवठा मंत्री गुलाबराव पाटील, मदत व पुनर्वसन मंत्री अनिल पाटील यांच्यासह उत्तर महाराष्ट्रातील खासदार, आमदार उपस्थित राहणार आहेत.
९०० बस धावणार
तपोवनातील सिटीलिंक बस डेपोच्या बाजूच्या मैदानावर सुरू असलेल्या या मेळाव्याच्या तयारीवर प्रशासनाने गुरुवारी अखेरचा हात फिरवला. ५० हजार ‘लाडक्या बहिणीं’ना घेऊन येण्याकरिता ९०० बस धावणार असून, सकाळपासूनच महिला मेळाव्याच्या ठिकाणी दाखल होणार आहेत.
वॉटरप्रूफ मंडपची सोय
विधानसभा निवडणुकीनिमित्त राजकीय घडामोडींना वेग आला आहे. महायुतीच्या वतीनेही जिल्ह्यात मेळाव्यांद्वारे शक्तिप्रदर्शन सुरू आहे. लाडकी बहीण योजनेचे ब्रँडिंग सुरू असून, लाभार्थींचे मेळावे घेतले जात आहेत. शहरासह जिल्ह्यात पावसाचा जोर वाढला आहे. पाऊस होण्याची शक्यता गृहित धरून वॉटरप्रूफ मंडप उभारण्यात आला आहे. ५० हजार व्यक्ती बसू शकतील अशी आसनव्यवस्था करण्यात आली आहे. उपस्थित महिलांना शासनाच्या कल्याणकारी योजनांची माहिती मिळावी याकरिता ठिकठिकाणी फलक लावण्यात आले असून, आरोग्य तपासणीसाठी सिव्हिल हॉस्पिटलद्वारे स्टॉलची उभारणी करण्यात आली आहे. बसह वाहन पार्किंगची व्यवस्था आणि वाहतुकीचे नियोजनही करण्यात आले आहे. जिल्हाधिकारी जलज शर्मा यांनी शिबिरस्थळावर जाऊन तयारीची पाहणी केली. मान्यवरांची बैठकव्यवस्था, वीजपुरवठा, जनरेटर्स, महाशिबिरास येणाऱ्या महिला व अन्य लाभार्थींची वाहतूक व्यवस्था, कार्यक्रमस्थळाची स्वच्छता, स्वच्छ पेयजल, पार्किंग व्यवस्था, मोबाइल स्वच्छतागृहे, वैद्यकीय व्यवस्था, प्रथमोपचार, रुग्णवाहिका, अग्निशामक वाहने, सांस्कृतिक कार्यक्रम, एलईडी स्क्रीन्स आदींबाबत जिल्हाधिकाऱ्यांनी आढावा घेतला.
…असे आहे नियोजन
-मेळाव्याच्या ठिकाणी जर्मन तंत्रज्ञानाचा वॉटरप्रूफ मंडप
-व्यासपीठापर्यंत जाण्याकरिता लाकडी रस्ता
-४० बाय १५० मीटरचा मुख्य मंडप
-मुख्य मंडपाव्यतिरिक्त इतर दोन मंडप
-दिव्यांग बांधवांसाठी रॅम्पची सोय
-बचतगटाचे स्टॉल्स, शासकीय स्टॉल्सची उभारणी
-सिटीलिंकच्या २००, तर एसटी महामंडळाच्या ७०० बसची व्यवस्था
वाहतूक मार्गात बदल
तपोवनात होणारा महिला सशक्तीकरण मेळावा, तुपसाखरे लॉन्समध्ये काँग्रेस नेत्यांच्या उपस्थितीत होणाऱ्या बैठका या पार्श्वभूमीवर पोलिसांकडून बंदोबस्तासह वाहतुकीचे नियोजन करण्यात आले आहे. मेळाव्यासाठी मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार उपस्थित राहणार असल्याने परिसरात सुमारे ८०० पोलिसांचा फौजफाटा तैनात असणार आहे. तपोवनातील लक्ष्मीनारायण मंदिर चौफुलीपासून साधुग्रामकडे जाणाऱ्या मार्गावर वाहनांना प्रवेश बंद केला आहे. मिरची हॉटेल सिग्नलकडून गोदावरी लॉन्स या मार्गापर्यंत अवजड वाहनांना प्रवेशबंदची अधिसूचना वाहतूक शाखेने काढली आहे. काँग्रेसच्या कार्यक्रम स्थळाभोवतीही पोलिस बंदोबस्त तैनात असणार आहे. सकाळी नऊपासून सायंकाळी कार्यक्रम संपेपर्यंत वाहतूक मार्गात बदल राहणार आहे.
पर्यायी मार्ग…
-लक्ष्मीनारायण पुलापासून पुढे उत्तरानगरकडे जाणारी वाहने, तसेच विरुद्ध दिशेने तपोवनाकडे येणारी वाहने मारुती चौफुलीपासून (नासर्डी नदी पूल) वळण घेऊन काठे गल्लीमधून पुणे महामार्गावरून पुढे मार्गस्थ होतील.
-छत्रपती संभाजीनगर महामार्गावरून अवजड वाहने सरळ सिद्धिविनायक चौकातून मार्गस्थ होत पुढे नांदूर नाक्याच्या दिशेने जातील. ही वाहने मिरची सिग्नल येथून गोदावरी लॉन्सकडे वळण घेणार नाहीत
एसटी बससाठी पार्किंगस्थळे
-येवला, नांदगाव, मालेगाव, निफाड, देवळा, बागलाण, चांदवड, कळवण, सुरगाणा, दिंडोरी, पेठ या भागांमधून येणाऱ्या एसटी बस नीलगिरी बागेच्या मैदानात थांबतील
-मिरची हॉटेल सिग्नलजवळील जेजूरकर मंगल कार्यालयासमोरील मैदानात नाशिक तालुक्यातून येणाऱ्या एसटी बस थांबतील
-सिन्नर, त्र्यंबकेश्वर, इगतपुरी तालुक्यांमधून येणाऱ्या बस ‘मारुती वेफर्स’च्या पुढे असलेल्या जागेत थांबतील