Authored byअजित भाबड | महाराष्ट्र टाइम्स.कॉम | Updated: 23 Aug 2024, 9:20 pm
sindhudurg child accident : सावंतवाडी तालुक्यातील मळेवाड कोंडुरे भागातील एका चिरेखाणीत डंपर अपघातात मृत्यू पावलेल्या लहान मुलीच्या मृतदेहाची परस्पर विल्हेवाट लावल्याची दुर्दैवी घटना घडली आहे.
मिळालेल्या माहितीनुसार, मळेवाड येथील एका चिरेखाणीत एका तीन वर्षीय बालिकेचा डंपरच्या धडकेत मृत्यू झाला होता. त्यानंतर याबाबत पोलीस ठाण्यात कोणतीही कल्पना न देता सदर बालिकेचा मृतदेह परस्पर दफन करण्यात आला होता. याबाबतची चर्चा सुरू झाल्यानंतर सावंतवाडी पोलिसांनी या प्रकरणाची गांभीर्याने दखल घेत गुरुवारी घटनास्थळाची पाहणी केली होती. त्यानंतर स्थानिक पोलीस पाटलांनी सावंतवाडी पोलिसात सदर प्रकरणाची फिर्याद नोंदविल्यानंतर अज्ञातांविरोधात गुन्हा दाखल करण्यात आला होता.
वडिलांनी मृतदेहाची दिली माहिती
आज सकाळी सावंतवाडी पोलिसांचे तसेच महसूल विभागाचे पथक घटनास्थळी पुन्हा एकदा दाखल होत मृतदेहाचा शोध सुरू करण्यात आला होता. यावेळी त्या मृत मुलीचे वडिल घटनास्थळावर उपस्थित होते. त्यांनी दाखवलेल्या जागेत खोदकाम करून शोध घेतला असता दुपारी साधारणपणे दुपारच्या सुमारास मृतदेह आढळून आला.
डंपर चालकाला अटक करणार
पीडित मुलीचा मृतदेह सापडल्यामुळे प्रकरणाची सत्यता उलगडली आहे. आता संबंधित डंपर चालकाला ताब्यात घेतले जाणार असून याप्रकरणी कोण कोण दोषी आहेत त्यांचा देखील शोध घेतला जाणार आहे. या घटनेनंतर सदर मृत मुलीचे वडिल छत्तीसगड येथे गेले होते. ते परतले असून त्यांचीही चौकशी होणार आहे, अशी माहिती पोलीस निरीक्षक अमोल चव्हाण यांनी दिली.