Jammu and Kashmir Election 2024 : अजित पवारांच्या राष्ट्रवादीने जम्मू-काश्मीर विधानसभा निवडणूकीसाठी उमेदवारांची यादी जाहीर केली आहे. ही यादी निवडणुकीच्या पहिल्या टप्प्यातील असून त्याबाबतची माहिती राष्ट्रवादी काँग्रेसचे राष्ट्रीय सरचिटणीस आणि जम्मू-काश्मीरचे प्रभारी ब्रिजमोहन श्रीवास्तव यांनी दिली आहे.
तीन उमेदवारांच्या नावाची केली घोषणा
राष्ट्रवादी कॉंग्रेस पक्षाच्या संसदीय मंडळाने पुलवामा जिल्ह्यात निवडणूक लढवण्यासाठी तीन उमेदवारांच्या नावांना मान्यता दिली आहे, त्यामध्ये ३३ – त्राल मतदार संघातून मोहम्मद युसूफ हजम, ३४ – पुलवामा मतदारसंघातून इश्तियाक अहमद शेख आणि ३५ – राजपुरा मतदारसंघातून अरुण कुमार रैना यांना संधी देण्यात आली आहे. हे सर्व उमेदवार राष्ट्रवादी काँग्रेस पक्षाचे अधिकृत उमेदवार म्हणून ‘घड्याळ’ या चिन्हावर निवडणूक लढवणार आहेत. विशेष म्हणजे इतर कुठल्याही पक्षाशी युती न करता राष्ट्रवादी काँग्रेस पहिल्यांदाच जम्मू-काश्मीरमध्ये निवडणूक लढवत आहे असेही ब्रीजमोहन श्रीवास्तव यांनी सांगितले. जम्मू-काश्मीर विधानसभेच्या ९० जागांसाठी तीन टप्प्यात निवडणुका होणार आहेत. यानुसार १८ सप्टेंबर रोजी पहिल्या टप्प्यात एकूण २४ विधानसभा मतदारसंघात मतदान होणार आहे. त्यामुळे उमेदवारांची नावे आणि इतर संबंधित माहिती लवकरच जाहीर केली जाईल असेही ब्रीजमोहन श्रीवास्तव यांनी स्पष्ट केले आहे.
राज्यात अधिकाधिक जागांवर लढणार
दरम्यान, आगामी विधानसभा निवडणुकीत पक्षाकडून उमेदवार उभे करण्यात येणार असल्याचे शुक्रवारी स्पष्ट केले. राज्यातील ९० जागांची चाचपणी पूर्ण झाली असून जास्तीत जास्त जागांवर आम्ही निवडणूक लढवणार आहोत, अशी माहिती राष्ट्रीय सरचिटणीस ब्रिजमोहन श्रीवास्तव यांनी दिली. किमान ६० जागांवर उमेदवार उभे करणार असल्याची माहिती पक्षातील सूत्रांकडून मिळत असून राष्ट्रवादी स्वबळावर या निवडणूका लढवणार असून जनता विकासाला मत देईल, अशी अपेक्षाही त्यांनी व्यक्त केली होती. मात्र, महाराष्ट्रात भाजपसोबत महायुतीत लढत असूनही जम्मू आणि काश्मिरमध्ये मात्र स्वबळावरच निवडणुका लढविण्यावर पक्ष ठाम असल्याचे त्यांनी स्पष्ट केलं होतं.