Nalasopara Clash Between Two Groups: नालासोपारा येथील संतोषभवन परिसरातील कारगिल नाल्याजवळ दोन गटात झालेल्या हणामारीत एकाचा मृत्यू झाला आहे. यात अन्य ३ जण जखमी झाले आहेत.
नालासोपारा येथील संतोषभवन परिसरातील कारगिल नाल्याजवळ परिसरातील दोन गटांमध्ये तुफान हाणामारी झाली. या हाणामारीत दोन्ही गटातील तरुणांनी एकमेकांना बेदम मारहाण केली. या हाणामारीत चाकूने वार केल्याने एक तरुण गंभीररित्या जखमी झाल्याने त्याचा जागीच मृत्यू झाला आहे. दिपक पाल असे या हाणामारीत मृत्यू झालेल्या तरुणाचे नाव आहे.
शुक्रवारी रात्री साडेदहा वाजताच्या सुमारास ही घटना घडली आहे. त्याचप्रमाणे या हाणामारीत आकाश पाल व शुभम ठाकूर या दोघांवर चाकूने वार करुन त्यांना जीवे मारण्याचा प्रयत्न करण्यात आला. आकाश पाल व शुभम ठाकुर यांच्या आणखी एक असे तीन जण गंभीररित्या जखमी झाले आहेत. जखमींपैकी दोघांना कांदिवली येथील डॉक्टर बाबासाहेब आंबेडकर रुग्णालयात दाखल करण्यात आले असून अन्य वसईतील खाजगी रुग्णालयात उपचारासाठी दाखल करण्यात आले आहे. जखमी झालेल्यांपैकी एकाची प्रकृती चिंताजनक असल्याची माहिती समोर आली आहे.
घटनास्थळी सध्या पोलीस बंदोबस्त तैनात करण्यात आला असून परिसरात तणावपूर्ण शांतता आहे. नालासोपारा येथे दोन गटांमध्ये झालेल्या हाणामारी प्रकरणी तुळींज पोलीस ठाण्यात दोन्ही गटातील तरुणांविरोधात भारतीय न्यायसंहितेच्या कलम 103 (1), 109,189, 190, 191, म.पो.ॲक्ट 35 अन्वये गुन्हा दाखल करण्यात आला आहे.