डेक्कन पोलिस ठाण्याच्या हद्दीत खासगी स्कूल व्हॅनमधून विद्यार्थी वाहतूक करत असताना चालकाने एका विद्यार्थिनीचा विनयभंग केल्याचा धक्कादायक प्रकार समोर आला आहे. त्यामुळे सुरक्षित विद्यार्थी वाहतुकीबाबत ‘आरटीओ’ खरेच गंभीर आहे का, असा प्रश्न निर्माण झाला आहे. शहरात सध्या सहा हजार स्कूल व्हॅन व स्कूल बस आहेत. त्यामध्येही अनेक स्कूल व्हॅनची अद्याप योग्यता प्रमाणपत्राचे नूतनीकरण केलेले नाही. त्या बस रस्त्यावर धावत असताना ‘आरटीओ’कडून काहीही कार्यवाही होताना दिसत नाही. याबरोबरच रिक्षा व खासगी व्हॅनमधून सर्रासपणे विद्यार्थी वाहतूक सुरू आहे. तसेच, क्षमतेपेक्षा जास्त विद्यार्थी वाहतूक केली जात असल्याचे दिसून येते होते; मात्र ‘आरटीओ’कडून या गोष्टींकडे जाणीवपूर्वक दुर्लक्ष केले जात असल्याचे दिसून येत आहे. त्यामुळे एखादी दुर्घटना घडली, तरच ‘आरटीओ’ जागे होणार का, असा प्रश्न निर्माण झाला आहे.
घटनेनंतर ‘आरटीओ’ला जाग
वाहतुकीचे नियमभंग व विविध प्रकारची कारवाई करण्यासाठी ‘आरटीओ’कडून चार भरारी पथके तयार करण्यात आली आहेत. या पथकांकडून शहराच्या वेगवेगळ्या भागात वाहतूक नियभंगाची वेगवेगळ्या प्रकारची कारवाई केली जाते. पण, या पथकांना खासगी व्हॅनमधून विद्यार्थी वाहतूक केली जात असल्याचे दिसत नाही का असा प्रश्न आहे. तसेच, बऱ्याच रिक्षांमधून व व्हॅनमधून क्षमतेपेक्षा जास्त विद्यार्थी वाहतूक केली जाते. आता विनयभंगाची घटना घडल्यानंतर ‘आरटीओ’ने तपासणीसाठी दहा पथके तयार केली आहेत. त्यामध्ये वाहनांची कागदपत्र, बस, रिक्षा आणि व्हॅनमध्ये मदतनीस आहे का, चालक आणि मदतनीस यांची चारित्र्य पडताळणी झाली का यासह विद्यार्थ्यांच्या सुरक्षिततेच्या दृष्टीने अन्य काटेकोर तपासणी करण्यात येत आहे.
कागदपत्रे तपासून स्कूल व्हॅनमध्ये पाठवा
शहरातील बहुतांश स्कूलमध्ये खासगी स्कूल व्हॅनमधून विद्यार्थी वाहतूक केली जाते. त्या मध्ये महिला अटेंडन्स नसतात. या स्कूल व्हॅनची ‘आरटीओ’कडे नोंदणीच नसल्यामुळे तिचे फिटनेस केलेले नसते. त्यामुळे दररोज जीव मुठीत धरूनच विद्यार्थी अशा स्कूल व्हॅनमधून प्रवास करत आहेत. त्यामुळे ‘आरटीओ’ने अशा स्कूल व्हॅनवर कारवाई करावी, अशी मागणी केली जात आहे. तसेच, पालकांनी देखील स्कूल व्हॅनची सर्व कागदपत्रे तपासूनच त्यामधून मुलांना पाठवावे, अशा सूचना केल्या जात आहे.
दर वर्षी शालेय वाहतूक करणाऱ्या बस, व्हॅन आणि रिक्षांची ‘आरटीओ’कडून तपासणी मोहिम राबविली जाते. त्यामध्ये सर्व बाबींची तपासणी केली जाते. मात्र, शहरासह राज्यातील विविध ठिकाणी घडलेल्या अत्याचाराच्या घटनेच्या पार्श्वभूमीवर आवश्यक कागदपत्रांसह मदतनीस आणि चालक यांची चारित्र्य पडताळणी झाली का? गाडीत मदतनीस आहे का, यासह अन्य बाबींची काटेकोर माहिती घेऊन कारवाई केली जात आहे.- स्वप्नील भोसले, उपप्रादेशिक परिवहन अधिकारी, पुणे