Shivaji Maharaj Statue Collapse In Malvan: मालवण येथे छत्रपती शिवाजी महाराज पुतळा दुर्घटना प्रकरणातील संशयित चेतन पाटीलला कोल्हापूर एलसीबीने ताब्यात घेतलं आहे. मध्यरात्री ३ च्या सुमारास चेतन पाटील कोल्हापूर एलसीबीच्या ताब्यात, कोल्हापूर पोलिसांच्या स्थानिक गुन्हे शाखेची कारवाई. त्यानंतर कोल्हापूर पोलिसांनी संशयित चेतन पाटीलला मालवण पोलिसांकडे सुपूर्द केलं.
मालवण येथे महाराजांचा पुतळा कोसळला
चार दिवसांपूर्वी सिंधुदुर्ग जिल्ह्यातील मालवण येथील राजकोट किल्ल्यावर आठ महिन्यांपूर्वी उभारण्यात आलेला छत्रपती शिवाजी महाराजांचा पुतळा अचानक कोसळला. यानंतर अनेक शिवभक्तांच्या भावना दुखावल्या गेल्या तर सरकार विरोधात रोष व्यक्त करण्यात येत आहे. निवडणुकांच्या तोंडावर पंतप्रधान मोदींच्या हस्ते उद्घाटन व्हावं यासाठी पुतळा गडबडीत उभा केला तसेच भ्रष्टाचार करण्यात आला असे अनेक आरोप सरकारवर करण्यात येत आहेत. तर पुतळा वाऱ्यामुळे पडला आणि याचे काम नेव्हीकडे देण्यात आले होते, असे म्हणत सरकारकडून भारतीय तटरक्षक दलावर खापर फोडण्याचा प्रयत्न होत आहे.
याप्रकरणी ठाण्याचा शिल्पकार जयदीप आपटे आणि चबुतराचे काम केलेले आणि सल्लागारपदी काम करणारे कोल्हापूरचे चेतन पाटील या दोघांवर हेतुपुरस्सर हत्येचा गुन्हा दाखल करण्यात आला आहे.
Shivaji Maharaj Statue Collapse: शिवाजी महाराज पुतळा कोसळल्या प्रकरणातील स्ट्रक्चरल सल्लागार पोलिसांच्या ताब्यात, चेतन पाटील कुठे सापडला
चेतन पाटील पोलिसांच्या ताब्यात
यानंतर दोन दिवसांपूर्वी मालवण पोलिसांनी कोल्हापुरातील छत्रपती शिवाजी महाराज पेठेत राहणारा चेतन पाटील याचा घरी ताब्यात घेण्यासाठी पोचले असता चेतन पाटील फरार होता. तर दुसरीकडे शिल्पकार जयदीप आपटे देखील फरार आहे. दोन दिवसांपासून चेतन पाटील याचे लोकेशन पुणे येथे दाखवत होतं. मात्र, काल रात्री तीनच्या सुमारास चेतन पाटील याचे लोकेशन कोल्हापूर दाखवल्यानंतर स्थानिक गुन्हे अन्वेषण शाखेच्या पथकाने त्वरित हालचाली करत चेतन पाटील याला ताब्यात घेतले. मालवण पोलिसांच्या हाती पुढील कारवाईसाठी सुपूर्द केले आहे. एकीकडे चेतन पाटील पोलिसांच्या हाती लागला असला तरी या प्रकरणातील ठाण्याचा शिल्पकार जयदीप आपटे अद्याप फरार असल्याने चेतन पाटील यांच्याकडून पुढील माहिती मिळण्याची शक्यता आहे.