Maharashtra Vidhan Sabha Election Seat Sharing : आगामी विधानसभा निवडणुकीत राष्ट्रवादी काँग्रेसला ६० पेक्षा जास्त जागा लढवायच्या आहेत.
आगामी विधानसभा निवडणुकीत राष्ट्रवादी काँग्रेसला ६० पेक्षा जास्त जागा लढवायच्या आहेत. अजित पवार यांच्यासोबत ५४ आमदार आहेत. याशिवाय सहा आमदार असल्याचा दावा अजित दादा यांनी काल रात्री राष्ट्रवादी युवक काँग्रेसच्या पदाधिकारी मेळाव्यात केल्याचं वृत्त ‘एबीपी माझा’ने दिलं आहे. यामध्ये काँग्रेसचे तीन, शेतकरी कामगार पक्षाचा एक, तर अपक्ष दोन आमदार असल्याची माहिती आहे.
नांदेड जिल्ह्यातील देगलूर विधानसभा मतदारसंघातील काँग्रेस आमदार जितेश अंतापूरकर यांनी कालच पक्षाला रामराम करत भाजपचा झेंडा हाती घेतला. त्यानंतर काँग्रेसला आणखी तीन धक्के बसण्याचे संकेत मिळत आहेत. कारण काँग्रेस आमदार हिरामण खोसकर, झिशान सिद्दीकी आणि सुलभा खोडके हेसुद्धा आपल्यासोबत असल्याचा दावा अजित पवार यांनी केला आहे.
Ajit Pawar : काँग्रेसच्या तिघांसह ६ आमदार राष्ट्रवादीसोबत, अजित दादांचा खणखणीत दावा, जागा वाढवून मागितल्या
याशिवाय अपक्ष आमदार देवेंद्र भुयार, संजयमामा शिंदे आणि शेकापचे श्यामसुंदर शिंदे आपल्या सोबत आहेत, असं दादा म्हणाल्याचं वृत्त आहे. नुकतीच मुख्यमंत्री एकनाथ शिंदे यांच्या वर्षा निवासस्थानी महायुतीतील शिवसेना-भाजप-राष्ट्रवादी या तीन प्रमुख पक्षांच्या महत्त्वाच्या नेत्यांची बैठक पार पडली. त्यानंतर राष्ट्रवादी युवक काँग्रेस पदाधिकारी मेळाव्यात अजित पवार यांनी बोलताना ६० जागांवर हक्क सांगण्याचा उल्लेख केला.
दरम्यान, भारतीय जनता पक्ष विधानसभा निवडणुकीत निम्म्याहून अधिक जागा लढवण्यावर ठाम असल्याचं बोललं जातं. म्हणजे २८८ पैकी १५० जागा लढवण्यावर भाजप अडून आहे. तर जिंकून येईल तीच जागा मिळेल, असं भाजप नेते सुधीर मुनगंटीवार यांनी स्पष्टपणे सांगितल्यामुळे दादा गटाची नाराजी ओढवण्याचा संभव आहे.
आधीच शिवसेना नेते तानाजी सावंत यांनी कॅबिनेटमध्ये मांडीला मांडी आणि उलट्यांबाबत केलेल्या वक्तव्याचे तीव्र पडसाद राष्ट्रवादी आणि महायुतीत उमटत आहेत. त्यामुळे विधानसभेच्या जागावाटपाचा तिढा कसा सुटणार, याकडे राजकीय वर्तुळाचं लक्ष लागून राहिलं आहे.