Maharashtra BJP Politics: इंदापूरमधून विधानसभा निवडणूक लढण्यास इच्छुक असलेले भाजपचे नेते आणि माजी मंत्री हर्षवर्ध पाटील यांनी आता भाजपच्याच जिल्हा अधिवेशनाला दांडी मारली आहे.
सलग तीनदा अपक्ष आणि एकदा काँग्रेसच्या तिकिटावर निवडून आलेले हर्षवर्धन पाटील गेल्या १० वर्षांपासून विधिमंडळाचे सदस्य नाहीत. २०१४ आणि २०१९ मध्ये राष्ट्रवादी काँग्रेसच्या दत्ता भरणे यांनी त्यांचा पराभव केला. आता पाटील तिकिटासाठी संघर्ष करत आहेत. महायुतीचं जागावाटप अद्याप जाहीर झालेलं नाही. पण सत्ताधारी युतीमध्ये सीटिंग गेटिंगचा फॉर्म्युला निश्चित होण्याची दाट शक्यता आहे. तसं झाल्यास इंदापूरची जागा भरणेंमुळे राष्ट्रवादीच्या अजित पवार गटाला सुटेल. त्यामुळे हर्षवर्धन पाटील अस्वस्थ आहेत. तिकिटासाठी त्यांचे प्रयत्न सुरु आहेत.
लोकसभेला मदत करा, विधानसभेला आम्ही तुम्हाला मदत करु, असा शब्द उपमुख्यमंत्री अजित पवारांनी लोकसभा निवडणुकीवेळी दिलेला होता. पण आता ते शब्द फिरवत आहेत, असा पाटील यांचा आक्षेप आहे. आपल्यासोबत असं वारंवार घडत असल्याचं त्यांनी सांगितलं. यंदा मात्र आपण माघार घेणार नसल्याचं त्यांनी म्हटलं आहे. त्यामुळे महायुतीत इंदापूरवरुन ठिणगी पडण्याची शक्यता आहे. आता पाटील यांनी थेट भाजपच्याच कार्यक्रमाकडे पाठ फिरवल्यानं त्यांच्या नाराजीची चर्चा जोर धरु लागली आहे.