Pune Traffic condition out of Control : शहरातील वाहतुकीची स्थिती दिवसेंदिवस हलाखीची होत असून, पोलिसांसह काही सुज्ञ नागरिक बेशिस्तांना वाहतुकीचे धडे देण्याचा प्रयत्न करतात. मात्र, त्यांचा हा सूज्ञपणा आणि समाजहिताची कृती त्यांच्या अंगलट येत असल्याचे दिसून येत आहे.
रस्त्याच्या विरुद्ध दिशेने आणि वेगाने येणाऱ्या दुचाकीस्वाराला हटकणाऱ्या महिला डॉक्टरला अर्वाच्च्य भाषेत शिवीगाळ करून जिवे मारण्याची धमकी दिल्याचा प्रकार गोळीबार मैदान येथे घडला. नियमभंग करून संबंधित दुचाकीस्वाराने डॉक्टर महिलेच्या दुचाकीला जोरात धडक देऊन झटापटही केली. या प्रकरणी ससाणेनगर येथे राहणाऱ्या ५१ वर्षीय महिला डॉक्टरने तक्रार दिली आहे. त्यावरून वानवडी पोलिसांनी विवेक अनिल शेलार (वय ३०, रा. शांतीनगर, वानवडी) याच्यावर गुन्हा दाखल केला आहे. ही घटना गुरुवारी (२९ ऑगस्ट) सायंकाळी सव्वासातच्या सुमारास घडली. ही शहरातील पहिली घटना नाही. गेल्या दोन महिन्यांत अशा पाच ते सहा घटना घडल्या आहेत. त्यामध्ये लोणीकंद येथील घटनेत कार अंगावर घालून जिवे मारण्याचा प्रयत्न झाला. बंडगार्डन पोलिस ठाण्याच्या हद्दीतील घटनेत पोलिस कर्मचाऱ्याने पीएमपी चालकालाच मारहाण केली आहे.
बेशिस्तांवर सीसीटीव्ही कॅमेऱ्यांचे लक्ष
वाहतूक पोलिसांकडून सीसीटीव्ही कॅमेऱ्यांद्वारे केल्या जाणाऱ्या कारवाईत प्रामुख्याने ‘हेल्मेट’ची कारवाई केली जात होती. मात्र, आता ‘झेब्रा क्रॉसिंग’ ओलांडणाऱ्यांपासून सिग्नल मोडणे, ‘नो-एंट्री’तून गाडी चालवणे, दुचाकीवर ट्रीपल सीट जाणे आदी प्रकारच्या बेशिस्तीवर लक्ष केंद्रित करण्याची सूचना करण्यात आली आहे, अशी माहिती वरिष्ठ पोलिस अधिकाऱ्यांनी दिली.
दोन महिन्यांतील प्रातिनिधिक घटना
– दुचाकीस्वार तरुणाने अचानक ब्रेक मारल्याने कारमधील तिघांनी दुचाकीस्वाराला बेदम मारहाण केल्याची घटना धानोरीमध्ये घडली.
– बाणेर-पाषण रस्त्यावर किरकोळ कारणावरून करचालकाने दुचाकीस्वार तरुणीच्या नाकावर ठोसा मारून जखमी केले.
– सिग्नलला थांबलेल्या कारचालकाने मागील वाहनाला पुढे जाण्यासाठी जागा न दिल्याने कारचालकाच्या नाकावर ठोसा मारला. गंभीर जखमी तरुणाच्या नाकावर दोन शस्त्रक्रिया.
– रस्त्यावर थांबल्याने वाहतूक कोंडी होत असून, बाजूला थांबा, असे म्हटल्याच्या रागातून अंगावर चारचाकी घालून चौघांना जीवे मारण्याचा प्रयत्न केल्याची घटना लोणीकंद परिसरात घडली.
– ‘पीएमपी’ चालकाला पोलिस कर्मचाऱ्याने भर रस्त्यात बसमध्ये चढून मारहाण केली.
नेमके काय घडले?
पोलिसांनी दिलेल्या माहितीनुसार, आरोपी तरुण दुचाकी घेऊन गोळीबार मैदान चौकातून विरुद्ध दिशेने भरधाव निघाला होता. दरम्यान, त्याने तक्रारदारांच्या दुचाकीला जोरात कट मारला. दुचाकी चालवताना त्याने हेडफोन परिधान केले होते. महिलेने आरोपीला हटकले असता, त्याला राग आला. त्याने पुन्हा महिलेच्या गाडीला जोरात धडक दिली. त्यानंतर जोरजोराने आणि अर्वाच्च्य भाषेत शिवीगाळ करून अश्लील हावभावही केले. त्यानंतर आरोपीने महिलेच्या अंगाशी झटापट करण्याचा प्रयत्न करून जीवे मारण्याची धमकी दिली.