Mumbai Bribe Case : घरच्या झडतीमध्ये काहीच न सापडल्याने एसीबीच्या अधिकाऱ्यांनी शितोळेंना चौकशीसाठी ताब्यात घेतले. सुरुवातीला उडवाउडवीची उत्तरे देणाऱ्या शितोळे यांनी शौचालयात पैसे टाकल्याचे सांगितले.
नेमकं प्रकरण काय?
एका खासगी कार्यालयातील लायजनिंग अधिकाऱ्याने बोरिवली पश्चिमेकडील ऑरम हॉटेलसाठी पीएनची गॅसच्या जोडणीकरिता मुंबई महापालिकेच्या पोर्टलवर अर्ज केला होता. याबाबतची परवानगी अग्निशमन दलाच्या अखत्यारित येत असल्याने दहिसर पश्चिमेकडील अग्निशमन केंद्राकडे हा अर्ज पाठविण्यात आला. हा अर्ज आल्यावर वरिष्ठ केंद्र अधिकारी प्रल्हाद शितोळे (४३) यांनी हॉटेलला भेट देऊन पाहणी केली. यानंतर मोबाइलच्या कॅल्क्युलेटरवर एक लाख ३० हजार रुपये टाइप करून इतकी रक्कम द्यावी लागेल, असे सांगितले. इतकी रक्कम देणे शक्य नसल्याने अधिकाऱ्याने कार्यालयाच्या मालकासह शितोळे यांची भेट घेतली. चर्चेनंतर शितोळे यांनी पुन्हा मोबाइलच्या कॅल्क्युलेटरवर ८० हजार इतकी रक्कम टाइप केली. ही रक्कम देणे जमणार नसल्याने अधिकाऱ्याने एसीबीच्या वरळी येथील कार्यालयात लेखी अर्ज केला.
६० हजार रुपये शौचालयात फ्लश
तक्रारीची पडताळणी केल्यानंतर एसीबीच्या पथकाने सापळा लावून कारवाई करण्याचे ठरविले. याचदरम्यान अर्जदाराने रक्कम कमी करण्यासाठी पुन्हा एकदा शितोळे यांची भेट घेतली. त्यावेळी ५० हजारांपेक्षा अधिक कितीही रक्कम द्या, असे शितोळे यांनी सांगितले. शितोळे राहत असलेल्या इमारतीमध्येच त्यांचे कार्यालय आहे. अर्जदार ६० हजार रुपये घेऊन द्यायला गेले असता, इमारतीच्या खालीच ते भेटले. लिफ्टमध्ये त्यांनी अर्जदाराकडून ६० हजार रुपये घेतले आणि कार्यालयात गेले. कार्यालयात अर्जदारासह आणखी काही व्यक्ती असल्याचे त्यांनी पाहिले. तसेच नोटांनाही विशिष्ट प्रकारची पावडर लावण्यात आल्याचे त्यांच्या लक्षात आले. संशय आल्याने शितोळे घरी गेले आणि त्यांनी ६० हजार रुपये शौचालयात टाकून फ्लश केले. घरच्या झडतीमध्ये काहीच न सापडल्याने एसीबीच्या अधिकाऱ्यांनी शितोळेंना चौकशीसाठी ताब्यात घेतले. सुरुवातीला उडवाउडवीची उत्तरे देणाऱ्या शितोळे यांनी शौचालयात पैसे टाकल्याचे सांगितले. सापळा कारवाईत पुरावा महत्त्वाचा असल्याने एसीबीच्या अधिकाऱ्यांनी प्लम्बरच्या मदतीने मलनि:सारण वाहिनी उघडली. जवळपास २० गटारांमधून ५७ हजार रुपये शोधून काढले. शितोळे यांच्याविरुद्ध लाचखोरीसह पुरावा नष्ट केल्याचा गुन्हा दाखल करून त्यांना अटक केली.
दोषी ठरविण्यासाठी पुरेसे पुरावे
प्रल्हाद शितोळे यांनी पुरावा नष्ट करण्यासाठी पैसे पाण्यात टाकल्याने त्यावर लावण्यात आलेली विशिष्ट प्रकारची पावडर निघून गेली आहे. असे असले, तरी पावडरसह नोटांच्या क्रमांकाच्या नोंदी आमच्याकडे असतात. त्यातच छाप्यादरम्यान त्यांच्याकडून या नोटा हस्तगत करण्यात आल्या आहेत. इतरही पुरेसे पुरावे असून त्या आधारे शितोळे दोषी ठरू शकतात, असे एका अधिकाऱ्याने सांगितले.