Bail Pola 2024: बळीराजाचा महत्त्वाचा सण पोळा आज (दि. २) साजरा होत असून, येत्या शनिवारी (दि. ७) गणराय घरोघरी विराजमान होणार असून, यादरम्यान गौरींचेही आगमन होणार आहे.
नाशिकलगत असणाऱ्या मखमलाबाद, दरी, मातोरी, नाशिकरोडनजीकचे दसक-पंचक, शिंदे-पळसे, देवळाली परिसरातील गावे, मुंबई-आग्रा महामार्गावरील विल्होळी परिसरातील गावे, अंबड-सातपूर परिसरासह पंचवटीतील काही भागात शेतजमिनी मोठ्या प्रमाणावर आहे. आधुनिक तंत्रज्ञानासोबतच अद्याप काही ठिकाणी पारंपरिक पद्धतीने बैलांच्या सहाय्याने शेती केली जाते. त्यामुळे या भागांमध्ये पोळ्याचा उत्साह आहे. शहरातील बाजारपेठेतही बैलांच्या सजावटीसाठी वस्तूंची रेलचेल दिसून आली. याशिवाय शहर व उपनगरातील नागरिकांची नाळही ग्रामीण संस्कृतीशी जोडलेली असल्याने घरोघरी बैलांच्या प्रतिमांचे पूजन होते. यामुळे बाजारात मोठ्या संख्येने मातीचे बैल दाखल झाले आहेत. याशिवाय कलाकुसर आणि रंगरंगोटी केलेल्या आकर्षक बैलजोड्याही उपलब्ध आहेत. प्रतिनग दहा रुपयांपासून, तर मोठ्या बैलजोड्या हजार रुपयांपर्यंतही उपलब्ध आहेत.
ग्रामीण भागात उत्साही माहोल
पोळ्याच्या पूर्वसंध्येलाच बैलांची स्वच्छता-स्नान व सजावटीची कामे सुरू झाली आहेत. आजच्या दिवशी बैलांच्या पाठीवर रंगरंगोटी व नक्षीकाम करून त्यांच्यावर झूल पांघरली जाईल. त्यांच्या गळ्यात घुंगरांच्या माळा, नवी वेसण, कासरा, पायात तोडे आदी आभूषणे घातली जातील. बैलांना पुरणपोळीचा नैवेद्य दाखविला जाईल. गावोगावी बैलांची मिरवणूक काढण्यात येऊन मारुतीच्या दर्शनासाठी त्यांना नेले जाते. घरी आणल्यानंतर बैलांचे औक्षण, पाद्यपूजा करून त्यांना पुरणपोळीचा नैवेद्य दिला जातो.
बाजारपेठेला उत्सवी साज
बळीराजाचा महत्त्वाचा सण पोळा आज (दि. २) साजरा होत असून, येत्या शनिवारी (दि. ७) गणराय घरोघरी विराजमान होणार असून, यादरम्यान गौरींचेही आगमन होणार आहे. या औचित्यावर रविवारी सुटीचा योग साधत नागरिकांनी विविध वस्तू खरेदीसाठी बाजारपेठेत गर्दी केल्याचे दिसून आले. शहरासह उपनगरांतीलही बाजारपेठाही सकाळपासूनच गर्दीने ओसंडल्या होत्या. पूजा साहित्यासह सजावटीसाठी पडदे, तोरण, वस्त्र, मखर, आसन, कृत्रिम फुले आणि इतरअनेक वस्तूंची खरेदी नाशिककरांनी केली. रविवारी पावसानेही उघडीप दिल्याने खरेदीचा उत्साह अधिक वाढला.
गणरायाच्या आगमनाची घरोघरी जोरदार तयारी सुरू आहे. यानिमित्त बाप्पाच्या मूर्तीपासून ते सजावट, नैवेद्य आणि पूजा साहित्य बाजारपेठेत दाखल झाले आहे. रविवारी दिवसभर शहरातील मुख्य बाजारपेठेसह उपनगरीय भागांत खरेदीसाठी झुंबड उडाली होती. यातही मुख्य बाजारपेठेतील कानडे मारुती लेनमध्ये घाऊक दरांत सजावट साहित्य उपलब्ध असल्याने या परिसरात कोंडी झाल्याचे चित्र रविवारी दिवसभर बघायला मिळाले. शहरासह पंचवटी, सिडको, सातपूर, नाशिकरोड, देवळाली कॅम्प आदी उपनगरांतील बाजारपेठांतही उत्साही वातावरण होते. शहरातील विविध भागांत लागलेल्या स्टॉलवरही गणेशमूर्ती बुकिंगसाठी गर्दी झाली होती.