मित्रांकडून अत्याचार अन् मानसिक छळ, विवाहितेने आयुष्य संपवलं, चॅटिंग पाहून पती हादरला

तिघांपैकी एक आरोपी नातेवाईक होता; म्हणून घरी येत होता

पोलिस सूत्रांनी दिलेली माहिती अशी की, यातील फिर्यादी तथा मयताचे पती व त्यांचे मुलाबाळासह कुटुंब हे पुणे येथे रहावयास होते. २८ जुलै २०२४ रोजी सहकुटूंब त्यांच्या मूळ गावी आले होते. यातील एक संशयीत आरोपी हा नातेवाईक आहे. नातेवाईक आरोपी हा नेहमी पुणे येथे घरी विवाहितेचा पती घरी नसतानाही ये-जा करत होता. तो नातेवाईक असल्याने मयत विवाहित महिलेच्या पतीला संशय आला नव्हता.

…अन् पीडित महिलेच्या पतीला फोन आला

विवाहित महिलेवर अत्याचार करणारे तिघे नराधम आरोपी हे एकमेकांचे खास मित्र आहेत. २१ ऑगस्ट २०२४ रोजी सकाळी ११ वाजता मयत विवाहिता ही तिच्या आईला भेटण्यासाठी घरी जावून येते असे सांगून गेली होती. सायंकाळी ४.१५ वाजण्याच्या सुमारास गावातील एका गृहस्थाने पीडित महिलेच्या पतीस फोन करून सांगितले की, तुमची पत्नी ही तलावात बुडून मयत झाली आहे. हे कळताच फिर्यादी हे तात्काळ घटनास्थळी पळत गेल्यावर त्यांना तलावाच्या काठावर पत्नीचा मोबाईल व चप्पल दिसून आली. लोकांनी मृतदेह बाहेर काढून प्राथमिक उपचारासाठी आरोग्यकेंद्रात दाखल केले होते. मात्र, तेथे डॉक्टरांनी तपासून ती मयत झाल्याचे सांगितले.

मोबाइलच्या चॅटिंग हिस्ट्रीवरून खरी माहिती समोर आली

मंगळवेढा पोलिसांनी विवाहित महिलेचा मोबाईल ताब्यात घेऊन तपास सुरू केला. मयत महिलेच्या मोबाईल मधील चॅटिंग हिस्ट्री चेक केली असता वरील तिघे आरोपी सातत्याने मयतास अनैतिक संबंध ठेवण्याबाबत त्रास देत होते. तिला शारिरिक त्रास देत असल्याने त्या त्रासास कंटाळून तिने तलावात उडी मारून आत्महत्या केली असल्याची बाब समोर आली आहे. मयत विवाहित महिलेच्या पतीने दिलेल्या फिर्यादीनुसार पोलिसांनी गुन्हा नोंद केला आहे.

पोलिसांनी ताबडतोब तपासाची चक्रे फिरवत तिघांना जेरबंद केले

सोलापूर जिल्ह्याचे नुतन पोलिस अधिक्षक अतुल कुलकर्णी यांनी पोलिसांना आदेश दिला. डी. वाय.एस.पी. विक्रांत गायकवाड, पोलिस निरिक्षक महेश ढवाण यांनी तपासाची वेगाने चक्रे फिरवून तिघा आरोपींना तात्काळ गजाआड केले आहे. तपासिक अंमलदार पोलिस उपनिरिक्षक पुरुषोत्तम धापटे यांनी तिघा आरोपींना अटक करून न्यायालयात उभे केले असता सुरज नकाते याला तीन दिवस, तोसिफ मुजावर यास दोन दिवस व शुभम नकाते याला चार दिवस अशी पोलिस कोठडी मिळाली आहे. मंगळवेढा पोलीस अधिक तपास करत आहेत.