Sharad Pawar In Kolhapur: भाजपचे नेते आणि उपमुख्यमंत्री देवेंद्र फडणवीस यांचे निकटवर्तीय मानले जाणारे समरजीतसिंह घाटगेंनी शरद पवारांच्या राष्ट्रवादीत प्रवेश केला आहे.
ऐतिहासिक गैबी चौकात झालेल्या सभेत शरद पवारांनी दोन मोठ्या घोषणा केल्या. त्यांनी घाटगेंचं पक्षात स्वागत केलं. त्यांची उमेदवारी जाहीर केली. घाटगेंना मंत्रिपद दिलं जाईल, असंही पवार म्हणाले. ‘समरजित घाटगेंनी निर्णय घेतला आणि परिवर्तन घडवलं. त्यांना महाराष्ट्राच्या विधानभेत पाठवा. समरजित घाटगे फक्त आमदार राहणार नाहीत, तर मंत्री होणार,’ अशी जाहीर घोषणा पवारांनी केली. घाटगेंनी गेल्या विधानसभा निवडणुकीत अपक्ष लढत दिली. त्यांनी तब्बल ८८ हजार मतं घेतली. राष्ट्रवादी काँग्रेसचे हसन मुश्रीफ कागलमधून सलग पाचव्यांदा निवडून आले.
पक्षफुटीनंतर मुश्रीफ अजित पवारांसोबत गेले. त्याआधी त्यांच्या घरावर ईडीनं धाड टाकली होती. त्याच मुश्रीफांवर शरद पवारांनी गैबी चौकातून सडकून टीका केली. ‘जनतेनं मुश्रीफांना साथ दिल्ली, सत्ता दिली. त्यांनी वाईट काळात पळून न जाता थांबणं आवश्यक होतं. त्यांच्या घरातल्या महिला, भगिनी आम्हाला गोळ्या घाला म्हणत होत्या. पण मुश्रीफ त्यांच्या घरात जाऊन बसले. हा कागलचा इतिहास नाही. आजचा पक्षप्रवेश इतिहास घडवणारा आहे. राज्यात सत्तांतर केल्याशिवाय आम्ही स्वस्थ बसणार नाही,’ अशी गर्जना पवारांनी केली.
Sharad Pawar: पवारांनी डाव टाकला! घाटगेंना सोबत घेत भाजपला धक्का; ऐतिहासिक गैबी चौकात २ मोठ्या घोषणा
कागलच्या ऐतिहासिक गैबी चौकातील सभेला लोकांची प्रचंड गर्दी होती. या उसळलेल्या जनसागराला पाहून शरद पवारांना दोन जुन्या नेत्यांची आठवण झाली. पवारांनी त्यांचा उल्लेख भाषणात केला. ‘माझी नजर जाईल तिथपर्यंत लोक दिसत आहेत. यावरुन एक गोष्ट समजते. इथली जनता परिवर्तनासाठी तयार आहे. येथे आज मला दोन जुन्या नेत्यांची आठवण येते. एक म्हणजे सदाशिवराव मंडलिक आणि दुसरे म्हणजे बाबासाहेब कुपेकर. काही वर्षांपूर्वी सदाशिवराव मंडलिक, बाबासाहेब कुपेकर हे दोन्ही नेते पक्षाची उभारणी करायची हा विचार करून आमच्यासोबत आले. कागलचा गड राखण्याचं काम या नेत्यांनी केलं,’ अशा शब्दांत पवारांनी त्यांच्या जुन्या सहकाऱ्यांच्या स्मृतींना उजाळा दिला.