Samarjeetsinh Ghatge Joins NCP SP: विधानसभा निवडणुकीच्या तोंडावर शरद पवारांनी भाजप, अजित पवारांना मोठा धक्का दिला आहे. भाजप नेते समरजीतसिंह घाटगे यांचा पक्षप्रवेश संपन्न झाला आहे.
२००९ मध्ये शरद पवार यांच्या उपस्थितीत सदाशिवराव मंडलिक यांच्या सभेला जशी गर्दी होती, तशीच गर्दी आज झाल्याचं घाटगे त्यांच्या भाषणात म्हणाले. शरद पवारांच्या पक्षात येत्या काही दिवसांत आणखी अनेकांचे प्रवेश होतील. पण माझ्या पक्षप्रवेशावेळी पवार साहेब स्वत: उपस्थित आहेत. त्याबद्दल मी त्यांचा आभारी आहे. मला हा मान, सन्मान कागलच्या जनतेमुळे मिळाला आहे, अशा भावना घाटगेंनी बोलून दाखवल्या.
गैबी चौकातच सभा घायची हा निर्णय शरद पवारांनी घेतला. गेल्या काही वर्षात गैबी चौक एकाच व्यक्तीच्या सभेसाठी आहे असं वाटायचं. पण या ठिकाणी ओरिजनल वस्तादच सभा घेऊ शकतो, असं घाटगे म्हणाले. मागील ८ वर्षे एका पक्षासोबत प्रामाणिकपणे काम केलं. मात्र आता शरद पवार यांच्या नेतृत्वात काम करणार. कागलचा पुरोगामी विचार पुढे नेणार, अशी ग्वाही घाटगेंनी दिली.
घाटगेंच्या हाती तुतारी, शरद पवारांनी डाव टाकला; दोन्ही उपमुख्यमंत्र्यांना एकाचवेळी धक्का
अनेक जण मला विचारतात, तुम्ही शरद पवारांच्या राष्ट्रवादीत जात आहात. पण महायुतीकडे राज्यात, केंद्रात सत्ता आहे. तुमच्याकडे काय आहे? माझं त्यांना उत्तर आहे, माझ्याकडे शरद पवार आहेत, असं घाटगे म्हणाले. ‘जयंत पाटील साहेब, गेल्या निवडणुकीत तुम्हीच शेवटच्या टप्प्यात त्यांच्यासाठी (हसन मुश्रीफ) माझा कार्यक्रम केला होता. तुम्हीच म्हणता टप्प्यात आले की कार्यक्रम करायचा. गेल्यावेळी चूक झाली. ती आता सुधारायची आहे. आता मी तुमच्यासोबत आहे’, अशा शब्दांत घाटगेंनी कागलमधून लढण्याचे संकेत दिले. हसन मुश्रीफ १९९९ पासून कागलचे आमदार आहेत.