Mahayuti Dispute Over Ladki Bahin Yojana: महायुतीत ‘लाडकी बहीण’ योजनेच्या श्रेयवादावरुन मंत्रिमंडळात जोरदार वाद झाल्याची माहिती आहे. यावेळी शिवसेनेकडून राष्ट्रवादीवर लाडकी बहीण योजनेचं चुकीचं नाव वापरल्याबद्दल आक्षेप घेण्यात आला.
आगामी विधानसभा निवडणुका लक्षात घेता राज्य मंत्रिमंडळाच्या गुरुवारच्या बैठकीकडे सर्वांचे लक्ष लागून राहिले होते. या बैठकीत अनेक घोषणांचा पाऊस पडेल, अशी शक्यता वर्तविण्यात येत होती. मात्र, या बैठकीत ‘लाडकी बहीण’ योजनेवरून महायुतीतील शिवसेना आणि राष्ट्रवादी काँग्रेसचे मंत्री आमने-सामने आल्याचे समजते.
गेल्या अनेक दिवसांपासून राष्ट्रवादी काँग्रेसकडून या योजनेचा प्रचार करताना ‘मुख्यमंत्री लाडकी बहीण योजना’ असे नाव न वापरता ‘माझी लाडकी योजना’ असे नाव सर्रास वापरले जात असल्याचा मुद्दा बैठकीत उपस्थित करण्यात आला. त्यावरून शिवसेना मंत्र्यांनी थेट नाराजी व्यक्त केली. या योजनेचे नाव बदलणे हा चुकीचा प्रकार आहे. यामुळे विरोधकांमध्ये चुकीचा संदेश जाऊ शकतो. आगामी निवडणुका लक्षात घेता त्याचा फटका बसू शकतो, अशी भीती शिवसेनेच्या मंत्र्यांकडून व्यक्त करण्यात आली. या मुद्यावरून बैठकीत जवळपास अर्धा तास नाराजीनाट्य रंगल्याची माहितीही महायुतीतील मंत्र्यांकडून नाव न छापण्याच्या अटीवर देण्यात आली. या नाराजीनाट्यानंतर मुख्यमंत्री एकनाथ शिंदे यांनीही याबाबत खंत व्यक्त केल्याचे कळते. मुख्यमंत्री शिंदे यांनीही यासंदर्भात मंत्र्यांना कानपिचक्या दिल्याचे कळते. उपमुख्यमंत्री देवेंद्र फडणवीस यांनी या प्रकरणात मध्यस्थी करण्याचा प्रयत्न केला. अशाप्रकारे चुकीचा संदेश बाहेर जाऊ नये, यासाठी सर्वच मंत्र्यांनी काळजी घ्यावी, अशी सूचना त्यांनी केल्याचे समजते.
योजनेचा आढावा
मंत्रिमंडळाच्या बैठकीत या योजनेचा सविस्तर आढावा घेण्यात आला. तसेच या योजनेबाबत अनेक सूचनाही करण्यात आल्या आहेत. आत्तापर्यंत झालेल्या नोंदणी आणि त्यासंदर्भातील माहितीचे बैठकीत सादरीकरण करण्यात आले.