Ganeshotsav 2024 Noise Pollution free festival: गणेश विसर्जन मिरवणूकीमध्ये ध्वनिप्रदूषणासंबंधीच्या नियमांचे काटेकोर पालन करणे अत्यावश्यक आहे. याचे उल्लंघन झाल्यास गणेश मंडळांना कायदेशीर कारवाईस सामोरे जावे लागेल, असे पोलिस प्रशासनाकडून आदेश देण्यात आले आहेत.
पोलीस अधीक्षक कार्यालयाच्या वतीने सार्वजिनक गणेशोत्सव-२०२४ व ईद-ए-मिलादच्या अनुषंगाने जिल्हास्तरीय शांतता व सद्भावना बैठक; तसेच पोलिस पाटील परिचय मेळाव्याचे गुरुवारी (पाच सप्टेंबर) आयोजन करण्यात आले. या मेळाव्यात डॉ. विनोद कुमार राठोड हे बोलत होते. यावेळी अप्पर पोलिस अधीक्षक सुनील लांजेवार, पोलिस उपअधीक्षक डॉ. सिद्धेश्वर मोरे यांच्यासह जिल्हातील सर्व समाजातील प्रतिष्ठित नागरिक, व्यापारी, स्थानिक लोकप्रतिनिधी, सरपंच, गणेश मंडळ पदाधिकारी, पोलिस पाटील, शांतता समिती सदस्य, महिला दक्षता समिती सदस्य यांची उपस्थित होती. पोलिस उपअधिक्षक डॉ. सिद्धेश्वर मोरे यांनी गणेशोत्सव व ईद-ए-मिलाद हे सण साजरा करताना नागरिकांनी सरकार आणि प्रशासनाच्या नियमांचे पालन करून सुरक्षित व जल्लोषपूर्ण गणेशोत्सव साजरा करण्यासाठीच्या नियमांची माहिती दिली. या वेळी सुनील लांजेवार यांनी ‘गणेशोत्सव भक्तिभावाने व उत्साहाने साजरा करतांना नियमांचे पालन करावे. गणेशोत्सव व ईद-ए- मिलाद या सणांच्या माध्यमांतून गावांमध्ये समाजोपयोगी कामे हाती घेण्यात यावीत, असे आवाहन केले. या सण-उत्सवाच्या अनुषंगाने काही समाजकंटकाद्वारे सोशल मीडियाच्या माध्यमांतून आक्षेपार्ह पोस्ट प्रसारित केल्या जातात. अशा आक्षेपार्ह पोस्टना गावातील तरुणाईने प्रतिसाद न देता याची माहिती पोलिसांना त्वरित द्यावी. सण, उत्सव साजरा करताना धार्मिक, सामाजिक सलोखा टिकून राहील, यासाठी प्रत्येकांनी योगदान द्यावे,’ असे आवाहव केले.
पोलिस अधीक्षक डॉ. विनयकुमार राठोड म्हणाले, ‘तरुणांनी सक्रिय सहभाग घेऊन जिल्ह्यात एक गाव- एक गणपती’ ही संकल्पना प्रभावी अंमलात आणावी. गणेश मंडळांनी स्थानिक प्रशासनाची नियमानुसार पूर्वपरवानगी घेणे आवश्यक आहे. गणेशोत्सव साजरा करतांना गणेश मंडळांनी व नागरिकांनी न्यायालयाने निर्गमित केलेले आदेश, शासन व प्रशासनाचे नियंमाचे काटेकोरपणे पालन करून सुरक्षित आणि जल्लोषपूर्ण गणेशोत्सव साजरा करावा.’
‘मंडळांनी सीसीटीव्ही लावावेत’
गणेश विसर्जन मिरवणूकीमध्ये ध्वनिप्रदूषणासंबंधीच्या नियमांचे काटेकोर पालन करणे अत्यावश्यक आहे. याचे उल्लंघन झाल्यास गणेश मंडळांना कायदेशीर कारवाईस सामोरे जावे लागेल. गणेश मंडळ परिसरात सीसीटीव्ही कॅमेरा लावण्यात यावा, असे आवाहन पोलिसांनी केले आहे. त्याचप्रमाणे गणेश मंडळांनी स्वयंसेवकांची नियुक्ती करावी; त्याचप्रमाणे महिला, मुली याची दर्शनरांग वेगळी ठेवण्यात यावी. दर्शनासाठी जाण्या-येण्याचा मार्ग वेगळा ठेवण्याचे नियोजन करावे, असेही सांगण्यात आले.
जुगार खेळणाऱ्यांवर कडक कारवाई
सण उत्सवाच्या परिस्थितीत उद्भवलेल्या परिस्थितीला हाताळण्यास पोलिस यंत्रणा सक्षम आहे. समाजविद्यातक कृत्य करणा-या कोणत्याही व्यक्तीची गय केली जाणार नाही. अशा व्यक्ती विरोधात कडक कायदेशिर कारवाई करण्यात येईल. तसेच गणेशमंडळात किंवा परिसरात बसुन जुगार खेळणाऱ्यांची गय केली जाणार नाही अशा विरोधात जुगार कायद्यान्चये गुन्हे दाखल करण्यात येईल, असे सांगण्यात आले.
१६० जणांचे सत्कार
पोलिसांना कायदा आणि सुव्यवस्था अबाधित ठेवताना; तसेच अपघातप्रसंगी, गुन्ह्यांच्या तपासाच्या अनुषंगाने, दोन समाजात तेढ निर्माण झालेल्या प्रसंगी शांततेकरिता मध्यस्थाची भूमिका बजावलेल्या; तसेच महिला दक्षता समितीच्या सदस्यांचा आणि उत्कृष्ट कार्य करणाऱ्या पोलिस पाटील अशा एकूण १६० जणांचा सत्कार पोलिस अधीक्षक राठोड यांच्या हस्ते सन्मानपत्र देऊन करण्यात आला.