Nitin Gadkari Will Lead Election Campaign: लोकसभेत भाजपला बसलेला मोठा फटका पाहता आता भाजपने आता राज्यातील प्रचाराची धुरा नितीन गडकरी यांच्या हाती सोपवली आहे.
लोकसभेत भाजपला जबरदस्त फटका
लोकसभा निवडणुकीत भाजपला जबरदस्त फटका बसला. बड्या नेत्यांच्या सभा, दौरे आणि बुथ पातळीवरील व्यवस्थापनाचा लाभ झाला नाही. महाआघाडी आणि महायुतीत मतांच्या टक्केवारीत विशेष फरक नाही. हे अंतर भरून काढण्याचे नियोजन भाजपने केले आहे. त्यासाठी तब्बल दशकभरानंतर गडकरी हे राज्यात सक्रिय होतील.
नितीन गडकरींच्या लोकप्रियतेचा भाजप फायदा घेणार
नितीन गडकरी यांनी गेल्या काही वर्षांत नागपूर, विदर्भ महाराष्ट्रच नव्हे; तर, संपूर्ण देशभरात विकासात मोठे योगदान दिले. विरोधी पक्षाच्या नेत्यांनी देखील त्यांच्या कामाचे कौतुक केले. त्यामुळे लोकांमध्ये त्यांच्याबद्दल विश्वास व्यक्त केला जात आहे. तथापि, दशकभरापासून त्यांनी राज्यातील राजकारणापासून स्वत:ला अलिप्त ठेवले. कुठल्याही वादावर किंवा घडामोडींवर त्यांनी मत व्यक्त केले नाही. उलट विकासकामांसाठी त्यांनी सर्वपक्षीय नेत्यांच्या बैठका घेतल्या. करोनाच्या संकट काळात त्यांनी राज्यात लक्ष केंद्रित केले होते. विदर्भातील सर्व पालकमंत्र्यांची बैठक घेतली होती. मात्र, राजकारणापासून ते दूर राहिले. भूपेंद्र यादव प्रभारी, तर अश्विनी वैष्णव सहप्रभारी असले तरी, यावेळी गडकरी यांच्या लोकप्रियतेचा फायदा राज्यात घेण्याचे भाजपचे प्रयत्न आहेत.
भाजपसाठी राज्यात मोठे आव्हान
राज्यात भाजपसमोर मोठे आव्हान आहे. त्यासाठी सर्वांना चालणारा आणि विकासाभिमुख चेहरा म्हणून नितीन गडकरी यांचे नाव समोर आले. प्रचारच नव्हे तर निवडणूक प्रक्रियेत त्यांची भूमिका महत्त्वाची राहील. उमेदवार निश्चित करण्यातदेखील त्यांचा सहभाग राहणार आहे.
Nitin Gadkari: डॅमेज कंट्रोलसाठी गडकरींकडे राज्याची धुरा, लोकसभेतील फटका भरुन काढण्यासाठी भाजपचा नवा प्लान
याबाबत बोलताना प्रदेशाध्यक्ष चंद्रशेखर बावनकुळे म्हणाले, पक्षाने केलेली विनंती नितीन गडकरी यांनी मान्य केली. राज्यातील ते बडे नेते आहेत. कोअर व संसदीय समितीचे ते सदस्य आहेत. संपूर्ण राज्य त्यांच्यावर प्रेम करते. लोकसभा निवडणुकीत त्यांनी राज्यात पंधरवडा दिला, विधानसभेसाठी एक महिना देतील.