chief minister ajit pawar : बाप्पाचा आशीर्वाद घेऊन सर्वच राजकीय पक्ष निवडणुकीसाठी मैदानात उतरताना पाहायला मिळणार आहेत. अशातच आता अजित पवार गटाचे नेते आमदार अमोल मिटकरी यांच्या घरीसुद्धा बाप्पाचे आगमन झाले असून 2024 ला अजित पवार राज्याचे मुख्यमंत्री होऊ दे, असं साकडं मिटकरी यांनी बाप्पाला घातलं आहे.
मिटकरी काय म्हणाले?
अमोल मिकटरी म्हणाले की, ”सालाबाद प्रमाणे याही वर्षी माझ्या घरी गणपतीचा उत्सव आहे. सर्व धर्म समभाव जपणारा आमचा गणपती आहे. सर्व समाजाची मुलं आमच्या गणपती उत्सवात सहभागी होतात. राज्याचे उपमुख्यमंत्री अजित पवार यांनी दहाव्यांदा राज्याचा अर्थसंकल्प मांडला आहे. त्यामध्ये महिलांसाठी ई -पिंक रिक्षा योजना आहे. मोफत शिक्षणाची सुविधा आहे. शेतकऱ्यांना मोफत विजबील आहे. आणि सर्वात महत्वाची लाडकी बहिण योजना राबवण्यात आली आहे. याच योजनेच्या भरवश्यावर 2024 ची विधानसभा निवडणूक जिंकून अजितदादा पुढच्यावर्षी मुख्यमंत्री होतील आणि बाप्पाची पूजा करतील.असं मिटकरी म्हणाले आहेत.
बारामतीमध्ये झळकले होते बॅनर
उपमुख्यमंत्री अजित पवार यांची बारामतीमध्ये जन सन्मान यात्रा दाखल झाली होती. त्यावेळी सुद्धा फिक्स मुख्यमंत्री, भावी मुख्यमंत्री म्हणून अजित पवार यांचे बॅनर झळकले होते. अजित पवार हे सत्तेत सहभागी झाल्यापासून त्यांच्या मुख्यमंत्री होण्याबाबतच्या चर्चा आहेत. अनेक वेळा अजित पवार यांनी देखील बोलवून दाखवलेलं आहे. परंतु अद्याप तरी ते शक्य झाले नाही. त्यामुळे आता आगामी विधानसभेत जास्तीत जास्त जागा जिंकून मुख्यमंत्रिपदावर दावा ठोकू शकतात.
दरम्यान, आज राज्यभरात गणपती उत्सव साजरा होत आहे. विशेषत: पुणे आणि मुंबई सारखी शहरे अक्षरक्ष: बाप्पाच्या भक्तीमध्ये तल्लीन झाले आहेत. ढोल ताशाच्या गजरात बाप्पा घरोघरी विराजमान झाला आहे. संपूर्ण राज्यभरात आनंदाचे वातावरण पाहायला मिळत आहे.