आमदारकीसाठी देवकाते आणि वैराट समर्थक अजितदादांकडे, जोरदार घोषणाबाजी, कोणाची वर्णी लागणार?

या शिष्टमंडळाने अजित पवारांसमोर शक्तिप्रदर्शन केले. गेल्या अनेक दिवसांपासून विश्वास देवकाते पाटील यांना विधान परिषदेवर संधी द्या, अशी मागणी त्यांचे समर्थक करत आहेत. मात्र, मध्यंतरी राष्ट्रवादी काँग्रेस फुटली आणि त्यानंतर लोकसभेची निवडणूक जाहीर झाली. त्यामुळे ही मागणी थोडी थांबली. मात्र, आता विधानसभेच्या तोंडावर राज्यपाल नियुक्त विधान परिषदेच्या १२ सदस्यांची नियुक्ती होणार आहे.

या संभाव्य नियुक्तीमध्ये आपली वर्णी लागावी यासाठी राज्यभरातील अनेक पदाधिकाऱ्यांनी देव पाण्यात घातले आहेत. दोन दिवसांपूर्वीच महिला आयोगाच्या अध्यक्षा रूपाली चाकणकर यांना विधान परिषदेवर संधी मिळणार आहे. असे दिसताच रूपाली ठोंबरे आणि इतरांनी त्याला आक्षेप घेतला.

राष्ट्रवादीमध्ये अशा प्रकारचे अंतर्गत वाद सुरू असतानाच आता धनगर समाजातून धडाडीचे असलेले नेते विश्वास देवकाते पाटील यांना विधान परिषदेला आमदारकीची संधी मिळाली पाहिजे, अशी मागणी करत त्यांचे समर्थक आज राष्ट्रवादी भवनवर पोहोचले. दुसरीकडे, वाई तालुक्यातील बोपर्डीचे सुपुत्र व राज्यभरातील झोपडपट्टी सुरक्षा दलाचे प्रमुख भगवानराव वैराट यांनी देखील खूप दिवसापासून आता साहेब थांबले आहेत. त्यांना आता विधान परिषदेची संधी द्या, अशी मागणी करणारे त्यांचे समर्थक अजित पवारांकडे पोहोचले.

एकूणच विधान परिषदेच्या राज्यपाल नियुक्त १२ आमदारांच्या संकेत राष्ट्रवादी काँग्रेस अजित पवारांचा वाटा जितका आहे. त्यामध्ये या दोघांना संधी मिळाली पाहिजे. अशी आक्रमक आणि आग्रही मागणी त्यांच्या समर्थकांनी केली आहे. या समर्थकांच्या घोषणाबाजीमुळे आज राष्ट्रवादी भवन घोषणांनी दनादून गेले.