महाराष्ट्र टाइम्स.कॉम | Updated: 8 Sept 2024, 9:13 pm
Badlapur Crime: बदलापुरात एका तरुणीवर बर्थडे पार्टीत बलात्कार झाल्याची घटना घडली आहे. या प्रकरणी पोलिसांनी तिघांना अटक केली आहे. पैकी एक आरोपी पीडितेची मैत्रीण आहे.
तरुणीच्या पेयात गुंगीचे औषध टाकलं; शुद्ध हरपताच अत्याचार
बदलापूर पूर्व भागात राहणाऱ्या पीडित तरुणीची काही दिवसांपूर्वी शिरगाव परिसरात राहणाऱ्या एका तरुणीसोबत ओळख झाली होती. भूमिका असं या तरुणीचं नाव आहे. दोन दिवसांपूर्वी भूमिकानं तिच्या वाढदिवसाच्या पार्टीसाठी तिच्या दोन मित्रांना आणि पीडित तरुणीला आपल्या घरी बोलावलं होतं. रात्री उशिरापर्यंत पार्टी केल्यानंतर भूमिकानं पीडित तरुणीच्या पेयात गुंगीचं औषध टाकलं. त्यामुळे बेशुद्ध अवस्थेत असलेल्या तरुणीवर भूमिकाच्या मित्रानं बलात्कार केला.
तरुणीवर बलात्कार झाल्याचं निष्पन्न
दुसऱ्या दिवशी सकाळी आपली मुलगी घरी परत न आल्यानं तिच्या पालकांनी भूमिकाशी संपर्क साधला. त्यावेळी तुमची मुलगी अतिमद्यपान करून पडल्याचं भूमिकानं सांगितलं. पालकांसोबत घरी परतलेल्या पीडित तरुणीला शुद्ध आल्यानंतर आपल्यावर बलात्कार झाल्याचं तिच्या लक्षात आलं. याबाबत तिनं तिचे पालक आणि पोलिसांना माहिती देताच पोलिसांनी तरुणीची वैद्यकीय चाचणी केली. यात या तरुणीवर बलात्कार झाल्याचं निष्पन्न झालं.
तरुणीवर बलात्कार एका मित्रानं केला की दोघांनी केला? हे मात्र अद्याप स्पष्ट होऊ शकलेलं नाही. याप्रकरणी बदलापूर पूर्व पोलिसांनी पीडित तरुणीला गुंगीचं औषध देणारी मैत्रीण, साताऱ्याहून आलेला शिवम राजे (२२ वर्ष) आणि संतोष रुपवते (४० वर्ष) या तिघांविरोधात बलात्काराचा गुन्हा दाखल या तिघांनाही बेड्या ठोकल्या आहेत.
अंबरनाथमध्ये चिमुकलीचा विनयभंग
अंबरनाथमध्ये एका ६ वर्षीय चिमुकलीचा २३ वर्षीय नराधमानं विनयभंग केल्याची घटना घडली आहे. या घटनेनंतर परिसरातील लोकांनी त्याला बेदम चोप देत पोलिसांच्या हवाली केलं. अंबरनाथच्या पूर्व भागातील शिवाजीनगर पोलीस ठाण्याच्या हद्दीत पीडित ६ वर्षीय मुलगी आणि २३ वर्षीय आरोपी एकाच परिसरात राहण्यास आहेत.
शनिवारी सायंकाळच्या सुमारास पीडित मुलगी रस्त्यावरून एकटी जात असल्याचं पाहून नराधमानं तिला आपल्या सोबत नेण्याचा प्रयत्न केला. त्यामुळे घाबरलेली मुलगी रडू लागल्यानं परिसरातील लोकांचं त्याकडे लक्ष गेलं. यानंतर लोकांनी या नराधमाला पकडून त्याला बेदम चोप दिला आणि त्याला पोलिसांच्या ताब्यात दिलं. या घटनेप्रकरणी शिवाजीनगर पोलिसांनी विनयभंगासह पोक्सो कायद्यांतर्गत गुन्हा दाखल केला असून नराधमाला बेड्या ठोकल्या आहेत.