Girl Student Jumps From Moving Rickshaw : अल्पवयीन तरुणीची रिक्षाचालकाने रिक्षा छेड काढली. मुलीने रिक्षा थांबवण्यास सांगितल्यानंतर चालकाने अधिकच वेगात रिक्षा पळवली. यावेळी तरुणीने घाबरुन चालत्या रिक्षातून उडी मारली.
चालकाने छेड काढली, घाबरुन तरुणीची चालत्या रिक्षातून उडी; कल्याणमधील संतापजनक घटना
ठाणे जिल्ह्यात कल्याण कोळशेवाडी परिसरात ही धक्कादायक घटना घडली आहे. संबंधित विद्यार्थिनी कल्याण पूर्व परिसरात क्लासला गेली होती. आपला क्लास सुटल्यावर ती रिक्षातून घरी जात होती. त्यावेळी अल्पवयीन विद्यार्थिनी एकटी असल्याचं पाहून रिक्षा चालकाने छेड काढण्याचा प्रयत्न केला. इतकंच नाही तर त्याने तिचा नंबरही मागितला.
भाजपच्या महिला नेत्याच्या ७ वर्षांच्या मुलाचा हृदयद्रावक अंत, सायकल चालवताना हार्ट अटॅकने मृत्यू
अचानक घडलेल्या या सगळ्या प्रकाराने ही विद्यार्थिनी घाबरली आणि तिने रिक्षा चालकाला रिक्षा थांबवण्यासाठी सांगितलं. मात्र चालकाने रिक्षा तर थांबवली नाहीच, मात्र मुद्दाम ती रिक्षा सुसाट वेगाने पुढे नेली. रिक्षा चालकाने रिक्षा अधिक वेगात पुढे नेल्याने विद्यार्थिनी अधिकच घाबरली. त्यानंतर या अल्पवयीन विद्यार्थिनीने रिक्षातून धावत्या दिशेतूनच उडी मारून घर गाठलं. रिक्षा चालक इतक्यावरच थांबला नाही, रिक्षावाल्याने या मुलीचा पाठलाग केला. तिच्या मागेमागे जात तिच्या घरापर्यंत पोहोचला. तिच्या घरापर्यंत जाऊन तिला शिवीगाळ केल्याचा धक्कादायक प्रकार घडला.
या संपूर्ण संतापजनक प्रकारामुळे घाबरलेल्या मुलीने तातडीने ही सगळी घटना आपल्या पालकांना सांगितली. आई-वडिलांनी तात्काळ पोलीस स्थानकात धाव घेत या प्रकरणाची तक्रार दाखल केली आहे. कल्याण कोळशेवाडी पोलिसांनी छेड काढणाऱ्या या रिक्षाचालकाविरोधात गुन्हा दाखल केला असून या संशयित नराधम रिक्षा चालकाला अटक करण्यात आली आहे. या सगळ्या धक्कादायक प्रकारामुळे परिसरातून संतप्त प्रतिक्रिया व्यक्त होत असून पुन्हा एकदा विद्यार्थिनी, महिलांच्या सुरक्षेचा प्रश्न ऐरणीवर आला आहे.