Nashik Minor Boys Kidnaping: नाशकातील सटाण्यात एक भयंकर घटना घडता घडता टळली आहे. येथे चोरीसाठी आलेल्या चोरट्यांनी घरात दोन अल्पवयीन मुलांना एकटं पाहून त्यांचं अपहरण केलं. त्यानंतर त्यांच्या वडिलांना फोन करुन खंडणी मागितली.
रविवारी (दि. ८) दुपारी १२ वाजेच्या सुमारास बागलाण तालुक्यातील किकवारी खुर्द येथील शेतकरी भास्कर अहिरे पत्नीसह बाहेर गेले होते. घरात मुलगा स्वप्निल अहिरे (वय १२) व स्वप्निलचा मित्र सार्थक सचिन खैरनार (वय १२) हे घरात अभ्यास करीत होते. घरात कुणीही नसल्याचा अंदाज घेत अज्ञात तीन इसमांनी घरात घुसून स्वप्निल व सार्थक यांना नकली बंदुकीचा व धारदार हत्याराचा धाक दाखवून ताब्यात घेतले. संशयितांनी दोघांना दोरीने बांधून व त्यांच्या मुसक्या आवळून शेजारीच असलेल्या दाट मक्याच्या शेतात डांबून ठेवले.
स्वप्निलकडे असलेल्या त्याच्या आईच्या मोबाइलवरून संशयितांनी स्वप्निलचे वडील भास्कर यांना फोन करून तुमच्या मुलाचे व त्याच्या मित्राचे अपहरण केल्याचे सांगून सुटकेसाठी दहा लाख रुपयांची मागणी केली. त्याचबरोबर पोलिसांना कळविल्यास मुलांना ठार मारण्याची धमकीही दिली.
भास्कर अहिरे यांनी परिस्थितीचे गांभिर्य ओळखून शेतातील कामगांराना व गावातील भावाला मोबाइलवरून फोन करून घरी जाण्यास सांगितले. शेतातील कामगार व भास्कर यांच्या भावाने गावातील सहकाऱ्यांना सोबत घेत घर गाठले. घरी कुणी नसल्याचे लक्षात आल्यानंतर शेतात धुसफूस होत असल्याचा त्यांना संशय आला. त्याचवेळी अपहरण झालेल्या दोन्ही मुलांनी एकमेकांच्या मदतीने आपली सुटका करवून घेत घर गाठले. यादरम्यान संशयित व ग्रामस्थांमध्ये झटापट झाली. याचा फायदा घेत दोन संशयित पळून जाण्यात यशस्वी ठरले. तिसरा संशयित सुनील चिंटू पवार (वय २४ रा. चिचली गडद ता. अहवा गुजरात) यास पकडून ग्रामस्थांनी पोलिसांच्या ताब्यात दिले.
संशयित चोरीसाठी आल्याचा संशय
या घटनेतील संशयितांनी यापूर्वी या भागात रेकी केल्याचे बोलले जात आहे. तिन्ही संशयित चोरीच्या उद्देशाने परिसरात फिरत होते. त्याच दरम्यान अहिरे यांच्या घरी मोठी व्यक्ती कोणीच नसल्याचे हेरून संशयितांनी पैशासाठी घरात अभ्यास करणाऱ्या स्वप्निल अहिरे आणि सार्थक खैरनार यांच्या अपहरणाचा डाव आखला. परंतु, दोन्ही मुलांची हुशारी आणि ग्रामस्थांमुळे अपहरणाचा डाव उधळला गेला. पोलिस संशयिताची कसून चौकशी करीत आहेत.