Ajit Pawar And Sharad Pawar: अजित पवार म्हणाले की राजकारणामुळे घरात फूट पडू नये, जर त्यांचं हृदयपरिवर्तन झालं असेल तर आम्हाला आनंदच आहे, आता त्यांना खरंच पश्चाताप झाला असेल तर त्यांनी राष्ट्रवादी पक्ष शरद पवारांना परत करावा.
राष्ट्रवादी काँग्रेस पक्षाची जनसन्मान यात्रा गडचिरोली येथे असताना पक्षाचे आमदार आणि कॅबिनेट मंत्री धर्मरावबाबा आत्राम यांच्या कन्येने राष्ट्रवादी काँग्रेस शरदचंद्र पवार पक्षाकडून आगामी विधानसभा निवडणूक लढविण्याच्या तयारीवर टीकाटिप्पणी झाली. आत्राम यांनी याविषयी कडाडून टीका करून त्याला विरोध केला. त्यावर भाष्य करताना अजित पवार यांनी राजकारणामुळे घरात फूट पडू देऊ नका, मी अशी चूक केली तुम्ही करू नका, असे वक्तव्य केले होते.
‘अजित पवार यांचे हृदयपरिवर्तन झालेले पाहून आम्हाला आनंद झाला आहे; परंतु हे परिवर्तन कृतीत उतरणे महत्त्वाचे आहे,’ असे राष्ट्रवादी काँग्रेस शरदचंद्र पवार पक्षाचे मुख्य प्रवक्ते महेश तपासे म्हणाले. ‘अजित पवार यांना खरेच पश्चात्ताप झाला असेल आणि इतरांना ते राजकारणामुळे घरात फूट पडू देऊ नका, असे सल्ले देत असतील तर त्यांनी सर्वप्रथम शरद पवार यांचा राष्ट्रवादी काँग्रेस पक्ष त्यांना सुपूर्द केला पाहिजे. वर्षानुवर्षे घडविलेले नेते, कार्यकर्ते अजित पवार यांनी पळवले. अजित यांना खरेच मनापासून असे वाटत असेल तर त्यांनी कृतीतून ते दाखवून द्यावे,’ असे आवाहन तपासे यांनी केले.
Ajit Pawar: हृदयपरिवर्तन झालेले पाहून आनंद, अजित पवारांनी पक्ष परत करावा; शरद पवार गटाच्या नेत्याचं आवाहन
‘चूक मान्य करणारा एकमेव नेता’
‘घरात राजकारण इतके शिरू नये की त्याने घर फुटावे,’ असे वक्तव्य अजित पवार यांनी केले होते. ‘सुनेत्रा पवार यांना सुप्रिया सुळे यांच्याविरोधात उमेदवारी द्यायला नको होती, असे त्यांनी उमद्या मनाने मान्यही केले. आपले कितीही चुकले तरी त्याचे रेटून समर्थन करणारे अनेक नेते या राज्याने पाहिले; परंतु सार्वजनिक जीवनात काम करताना आपल्याकडून चूक झाली हे इतक्या मोकळेपणाने बोलणारा एकमेव नेता राज्याला मिळाला आहे. तरीही राज्यात काही लोक संकुचित वृत्तीचे असल्याने त्यावर टीका करत आहेत. अजित पवार जे पोटात असते तेच बोलतात, त्यामुळे त्याचा वेगळा अर्थ काढू नये,’ असेही राष्ट्रवादीचे प्रवक्ते उमेश पाटील म्हणाले.