Pune Dog Tortured And Hanged To Death: पुण्यात एका श्वानासोबत अमानवीय कृत्य करण्यात आलं आहे. या श्वानाला मारहाण करत त्याला फाशी देण्यात आल्याची माहिती आहे. या प्रकरणी आदित्य ठाकरेंनी सोशल मीडियावर पोस्ट करत घटना उघडकीस आणली.
याप्रकरणी प्रभावती विनायक जगताप आणि ओंकार विनायक जगताप या दोघांवर गुन्हा दाखल करण्यात आला आहे. याप्रकरणी मिशन पॉसीबल फाऊंडेशनच्या पदमिनी पिटर स्टंप (वय ६६) यांनी पौड पोलिसात तक्रार दाखल केली आहे.
याबाबत मिळालेली अधिक माहिती अशी की, मुळशी तालुक्यातील पिरंगुट येथे असणाऱ्या प्रभावती जगताप आणि त्यांचा मुलगा विनायक जगताप यांनी हातात काठी घेऊन या श्वानाला बेदम मारहाण केली. त्यानंतर अर्काय हॉटेलच्या बाजूला ओढ्यातील झाडाझुडपामध्ये असलेल्या पत्रा शेडमध्ये ओंकार विनायक जगताप याने दोरीचा फास देऊन त्या श्वानाची हत्या केली. या घटनेचा एक हृदयद्रावक व्हिडिओही समोर आला आहे.
Pune News: पुण्यात क्रूरतेचा कळस! मायलेकाकडून श्वानाला मारहाण करत फाशी, आदित्य ठाकरेंनी समोर आणली घटना
याबाबत आदित्य ठाकरे यांना सोशल मीडियावरून माहिती मिळाली. त्यनंतर त्यांनी याबाबत पुणे पोलिसांना पोस्ट करत घटनेची माहिती दिली. ही माहिती मिळताच पुणे पोलिसांनी संबंधित महिला आणि तिचा मुलगा यांच्यावर गुन्हा दाखल केला. भारतीय न्याय संहिता सन २०२३ चे कलम ३२५ सह प्राणी कृरता अधिनियम १९६० चे कलम ११ (१) (ए) आणी ११ (१) (एल) अन्वये प्रभावती विनायक जगताप (रा. पिरंगुट, निकटेवस्ती ता. मुळशी जि. पुणे मुळ रा. कुळे ता. मुळशी जि. पुणे) आणि ओंकार विनायक जगताप (रा. पिरंगुट, निकटेवस्ती ता. मुळशी जि. पुणे मुळ रा. कुळे ता. मुळशी जि. पुणे) यांच्या विरोधात गुन्हा दाखल करण्यात आला आहे. या प्रकरणाचा अधिक तपास पौड पोलीस करत आहेत.