राष्ट्रवादी काँग्रेसनं विधानसभा निवडणुकीसाठी आमदारांची यादी प्रसिद्ध केली आहे. त्यांनी जवळपास सगळ्याच आमदारांना पुन्हा संधी दिली आहे. पण अर्जुनी मोरगावचे आमदार चंद्रिकापुरे यांचं तिकीट कापलं आहे.
भाजपचे नेते आणि माजी मंत्री राजकुमार बडोले यांनी कालच राष्ट्रवादीत प्रवेश केला. फडणवीस सरकारच्या काळात बडोले यांच्याकडे सामाजिक न्याय मंत्रालयाचा कारभार होता. २०१९ मध्ये त्यांचा निसटता पराभव झाला. राष्ट्रवादी काँग्रेसचे मनोहर चंद्रिकापुरे अवघ्या ७१८ मतांनी विजयी झाले. आता त्याच चंद्रिकापुरेंचा पत्ता कापून बडोलेंनी राष्ट्रवादीतून उमेदवारी मिळवली आहे.
अर्जुनी मोरेगाव मतदारसंघ गोंदिया जिल्ह्यात येतो. राष्ट्रवादी काँग्रेसचे कार्यकारी अध्यक्ष असलेले प्रफुल पटेल याच जिल्ह्यातून येतात. चंद्रिकापुरेंना गेल्या वेळी तिकीट मिळवून देण्यात पटेल यांची भूमिका महत्त्वाची होती. आताही राजकुमार बडोलेंच्या पक्षप्रवेशात आणि त्यांना तिकीट देण्यात पटेल यांनी भूमिका पार पाडली आहे. बडोलेंच्या पक्षप्रवेशावेळी पटेल त्यांच्या अगदी शेजारीच उभे होते.
राष्ट्रवादी काँग्रेसच्या स्थापनेनंतर १९९९ आणि २००४ मध्ये अर्जुनी मोरगावातून पक्षाचा उमेदवार विजयी झाला. पण २००९ आणि २०१४ मध्ये भाजपच्या बडोलेंनी बाजी मारली. २०१९ मध्ये त्यांचा विजय अगदी थोडक्यात हुकला. आता तर विद्यमान आमदाराला डावलून त्यांना संधी देण्यात आलेली आहे. चंद्रिकापुरेंबद्दल मतदारसंघात मोठी नाराजी आहे. शेती, विजेशी संबंधित प्रश्न त्यांनी सोडवलेले नाहीत. त्यांचा जनसंपर्कही फारसा नाही. त्यामुळे त्यांना पुन्हा तिकीट दिल्यास पराभव होईल असे अहवाल राष्ट्रवादीकडे होते. त्यामुळेच त्यांना डच्च देण्यात आला आहे. बडोले भाजप सोडून राष्ट्रवादीत गेल्यानं ताटातून वाटात गेल्याची चर्चा आहे.