Indapur Assembly constituency: इंदारपूर विधानसभा मतदारसंघातून हर्षवर्धन पाटील विरुद्ध दत्तात्रय भरणे अशी लढत होणार असे वाटत असताना प्रवीण माने यांनी अपक्ष म्हणून अर्ज दाखल केला आहे.
इंदापूर तालुक्यातला राजकीय सामना हा राष्ट्रवादी विरुद्ध राष्ट्रवादी असाच रंगणार आहे. मात्र याला हर्षवर्धन पाटील विरोध दत्तात्रय भरणे अशी किनार येण्याऐवजी शरद पवार विरुद्ध अजित पवार असे किनार येण्याची शक्यता आहे, मात्र या दुरंगी राजकीय लढतीला आता दृष्ट लागली असून शरद पवारांकडे गेलेले प्रवीण माने यांनी बंडाचे हत्यार उपसत आता अपक्ष उमेदवारी अर्ज भरला आहे.
इंदापूर तालुक्यात तिरंगी लढत झाल्यास कोणाला फायदा आणि कोणाला तोटा याची गणिते आतापासूनच मांडली जात आहेत. आज उमेदवारी अर्ज भरलेले प्रवीण माने नेमके कोण..? आणि त्यांची इंदापूर तालुक्यातील प्रभावाची शक्यता किती?
प्रवीण माने हे राज्यातील दुसऱ्या क्रमांकाचा दूध उद्योग असलेल्या सोनाई उद्योग समूहाचे संचालक आहेत. ते जिल्हा परिषदेचे माजी बांधकाम व आरोग्य सभापती देखील आहेत. बांधकाम व आरोग्य सभापती असताना नेमके कोरोनाच्या काळात प्रवीण माने यांनी पुणे जिल्ह्यातील आरोग्य खात्यासाठी केलेले काम अनेकांना माहित आहे. तेथूनच प्रवीण माने यांची इंदापूरच्या आमदारकीचे उमेदवार अशी चर्चा सुरू झाली होती, मात्र २०१४ च्या मोदी लाटेमध्ये त्यांचेही स्वप्न विरून गेले आणि दुसरीकडे मोदी लाट असताना देखील इंदापूर मध्ये अजित पवारांचे शिलेदार असलेले दत्तात्रय भरणे निवडून आले.
२०१४ ते २०१९ आणि २०१९ ते २०२४ पर्यंत दहा वर्षे दत्तात्रय भरणे यांची आमदारकी शाबूत राहिली. या दोन्ही वेळेस हर्षवर्धन पाटील यांना पराभवाचा सामना करावा लागला. विशेष म्हणजे राज्यामध्ये वीस वर्ष सत्तेत असलेले हर्षवर्धन पाटील सत्तेच्या बाहेर फेकले गेले. आता तेच हर्षवर्धन पाटील तुतारी हातात घेऊन पुन्हा एकदा दत्तात्रय भरणे यांच्यासमोर उभे ठाकणार आहेत, तर त्यांच्या या रस्त्यात अडथळा आहे, प्रवीण माने यांचा..!
माने हे जायंट किलर ठरू शकतील का?
अर्थात प्रवीण माने हे जेवढे हर्षवर्धन पाटलांसाठी नुकसान कारक, तेवढेच दत्तात्रय भरणे यांच्यासाठी देखील नुकसान कारक ठरतील अशी शक्यता मांडली जात आहे. त्याला वेगवेगळी कारणे देखील दिली जात आहेत. दुसरीकडे प्रवीण माने हे जायंट किलर ठरू शकतील का? असा देखील प्रश्न उपस्थित केला जात आहे. अर्थात आप्पासाहेब जगदाळे आणि भरत शहा यांची साथ त्यांना मिळाली, तरच ते हा पराक्रम करून दाखवतील अशी देखील चर्चा सध्या तालुक्यात सुरू आहे.
इंदापूर तालुक्यात चमत्कार घडू शकतो!
भरत शहा यांचे इंदापूर शहरात असलेले वर्चस्व आणि नीरा नदीकाठच्या भागात आप्पासाहेब जगदाळे यांनी उभा केलेले वलय याची प्रामाणिकपणे साथ प्रवीण माने यांना मिळाली, तरच इंदापूर तालुक्यात चमत्कार घडू शकतो असे राजकीय तज्ञ सांगत आहेत. मात्र दुसरीकडे गेल्या दहा वर्षातील केलेली विकास कामे दत्तात्रय भरणे यांच्यासाठी मोठी जमेची बाजू ठरणार आहे. तथापि आपल्याच कार्यकर्त्यांना ठेकेदारीची कामे दिल्याने कार्यकर्त्यांनी चुकीची कामे करून लोकांमध्ये रोष पसरवला आहे. त्याचा देखील फटका दत्तात्रय भरणे यांना बसू शकतो. शिवाय दहा वर्षाची अँटिइकंबन्सी दत्तात्रय भरणे यांच्यासाठी नुकसानकारक ठरू शकते.