विधानसभा निवडणुकीआधी मनसेने आपली दुसरी यादी जाहीर केली आहे. या यादीमध्ये राज ठाकरेंनी दिवंगत आमदार गोल्डन मॅन रमेश वांजळे यांच्या मुलाला खडकवासला विधानसभा मतदारसंघातून उमेदवारी दिली आहे. या उमेदवारीसाठी मुयरेश वांजळे राज ठाकरेंना भेटायला गेले तेव्हा राजसाहेबांना अश्रू अनावर झाल्याचं वांजळेंनी सांगितलं.
हायलाइट्स:
- विधानसभा निवडणुकीआधी मनसेकडून आपली दुसरी यादी जाहीर
- गोल्डन आमदार रमेश वांजळेंच्या मुलाला उमेदवारी
- मयुरेश वांजळेंनी सांगितली राज ठाकरेंसोबतच्या भेटीची इनसाईड स्टोरी
मयुरेश वांजळे म्हणाले, ज्यावेळेस मी राज साहेबांना भेटायला गेलो तेव्हा मला पाहताच राजसाहेबांना अश्रू अनावर झाले, ते म्हणाले मला वाटल माझा रमेशचं आला. ते नेहमी म्हणतात माझा वाघ गेला पण त्यांना मला समोर पाहून त्यांच्या त्याच वाघाचा छावा दिसला अन् त्यांना अश्रू अनावर झाले. राजसाहेबांची ही अवस्था पाहून मी प्रचंड भावुक झालो होतो. मात्र आम्ही ठरवलं आहे आपण आपल्या भावना दाबून ठेवायच्या. आता ज्या दिवशी मी जिंकेल त्याच दिवशी रडेल. कारण आम्ही रडणारे नाहीत तर लढणारे आहोत, असं वांजळे म्हणाले.
दरम्यान, राज ठाकरे यांनी मयुरेश वांजळे यांच्या भेटीमध्ये त्यांना अनेक प्रश्न केले. तुझं वय हे कमी आहे तू जर मनसेचे भविष्य असशील तर पुढचा तुझा रोड मॅप काय आहे. या राजसाहेबांच्या प्रश्नाला उत्तरं देताना मी पुढील 25 वर्षाचा विकासाचा रोड मॅप राज साहेबांसमोर ठेवला आणि त्यानंतरच माझ्या उमेदवारीचा मार्ग मोकळा झाल्याचं मयुरेश वांजळेंनी सांगितलं.