Keda Aher On Rahul Aher: माझ्या भावनांशी खेळत माझा विश्वासघात करणाऱ्याला जनता-जनार्दनच धडा शिकवेल, असा विश्वासही त्यांनी चांदवड येथील कार्यकर्ता संवाद मेळाव्यात व्यक्त केला.
माझा विश्वासघात केला…
माझ्या भावनांशी खेळत माझा विश्वासघात करणाऱ्याला जनता-जनार्दनच धडा शिकवेल, असा विश्वासही त्यांनी चांदवड येथील कार्यकर्ता संवाद मेळाव्यात व्यक्त केला. मेळाव्यात केदा आहेर म्हणाले, की आमदार राहुल आहेर यांनी १७ तारखेला माघारीची घोषणा केली, तर भाजप कार्यालयातील १६ तारखेच्या यादीतच त्यांची उमेदवारी निश्चित होती. पण, तरीही मी भाऊ म्हणून विश्वास ठेवला. मात्र नंतर त्यांच्या मनातील कपट सर्वांसमोर उघड झाले. देवळा तालुक्यातील जनतेला माझी कामाची पद्धत माहिती आहे. ओठात एक अन् पोटात एक असे मला कधीच जमले नाही.
शेतकऱ्याचा विकास हेच ध्येय
सर्वसामान्य शेतकरी कुटुंबातील असून, मला शेतकरी व मातीच्या प्रश्नांची चांगली जाणीव असल्याने शेतकऱ्याचा विकास हेच ध्येय ठेवून काम करणार आहे. यावेळी भाजपचे शहराध्यक्ष प्रशांत ठाकरे, संजय शिंदे, सरपंच प्रभाकर ठाकरे, संजय पवार, भास्कर गांगुर्डे, परवेजा बागवान, सागर पगार, माया निरभवणे, संजय पाचोरकर, प्रशांत वैद्य यांची भाषणे झाली. मेळाव्यास वडनेर भैरव येथील भैरवनाथ देवस्थानचे अध्यक्ष योगेश साळुके, सुनील शेलार, माणिक थोरे, प्रकाश देवढे, भागवत जाधव आदींसह देवळा-चांदवड मतदारसंघातील केदा आहेर समर्थक उपस्थित होते.
माझ्या उमेदवारीचा निर्णय चांदवड-देवळ्यातील मायबाप जनतेच्या कोर्टात आहे. चांदवड आणि देवळा येथील संवाद मेळाव्यांतून जनताच माझ्या उमेदवारीबाबत ठरवेल. कारण, आता ही निवडणूक सर्वसामान्य जनतेने हाती घेतली आहे.-केदा आहेर, संचालक, ‘नाफेड’